Лінкі ўнівэрсальнага доступу

Хроніка перасьледу 20 траўня: супраць Пуцілы і Рудзіка з Nexta завялі крымінальную справу за кіраваньне тэрарыстычнай арганізацыяй


Сьцяпан Пуціла, заснавальнік тэлеграм-каналу Nexta
Сьцяпан Пуціла, заснавальнік тэлеграм-каналу Nexta

У Беларусі па-ранейшаму працягваюцца затрыманьні, ператрусы, катаваньні ў ізалятарах, аказваецца ціск на палітвязьняў, ліквідоўваюцца грамадзкія аб’яднаньні.

Чатыры гады калёніі за абразы на адрас Лукашэнкі

На закрытым пасяджэньні суду Наваполацку 20 траўня быў вынесены прысуд жыхару гэтага гораду Міхаілу Лабаню. Яго абвінавацілі ў паклёпе ў дачыненьні да Лукашэнкі (ч.1 арт. 367), абразе Лукашэнкі (ч.1 арт. 368) і абразе прадстаўніка ўлады (арт. 369 Крымінальнага кодэксу).

Судзьдзя Віталь Лапко прызнаў яго вінаватым і па сукупнасьці пакараньняў канчаткова прысудзіў 4 гады пазбаўленьня волі ў калёніі агульнага рэжыму і штраф у памеры 100 базавых велічынь.

Супраць Сьцяпана Пуцілы і Яна Рудзіка з Nexta пачалі крымінальную справу за кіраваньне тэрарыстычнай арганізацыяй

Заснавальніка тэлеграм-каналу Nexta Сьцяпана Пуцілу і супрацоўніка Nexta Яна Рудзіка Сьледчы камітэт называе кіраўнікамі тэрарыстычнай арганізацыі.

«З 2020 году абвінавачаныя выкарыстоўвалі свае інфармацыйныя рэсурсы для дэстабілізацыі становішча на тэрыторыі Беларусі і радыкалізацыі так званых акцый пратэсту, — гаворыцца ў заяве Сьледчага камітэту. — Вышэйназваныя тэрарысты неаднаразова заклікалі да распальваньня сацыяльнай варожасьці і непрыязі, да блякаваньня дарог і каардынацыі вулічных беспарадкаў, учыненьня тэрактаў на чыгунцы і дывэрсій на прадпрыемствах, якія маглі прывесьці да тэхнагенных катастроф».

Паводле часткі 1 артыкула 290-5 Крымінальнага кодэксу, пра якія гаворыцца ў паведамленьні СК, можа пагражаць да 15 гадоў зьняволеньня.

ГУБАЗіК хваліцца, што нібыта затрымаў некалькі адміністратараў ТГ-каналаў Nexta

ТГ-канал ГУБАЗіК піша, што затрымалі некалькіх адміністратараў тэлеграм-каналаў, якія працавалі на Nexta. Пацьверджаньня гэтай інфармацыі зь іншых крыніц пакуль няма.

Чарговыя затрыманьні ў Менску

Праўладныя тэлеграм-каналы паведамляюць пра затрыманьне Максіма Чувінава. Хлопец трапіў на фатаздымак жнівеньскай акцыі пратэсту 2020 году — па гэтым фатаздымку яго і вылічылі. Яму інкрымінаваны артыкул 342 Крымінальнага кодэксу Беларусі (Арганізацыя і падрыхтоўка дзеяньняў, якія груба парушаюць грамадзкі парадак. альбо актыўны ўдзел ў іх), паведамляе «Вясна».

Таксама ГУБАЗіК затрымаў Андрэя Дараховіча. Той працаваў настаўнікам гісторыі ў менскім Лінгвагуманітарным каледжы. Сілавікі абвінавачваюць яго ў рэгістрацыі ў пляне «Перамога», удзеле ў пратэстах і «ўцягваньні ў іх малалетніх дзяцей». ГУБАЗіК сьцьвярджае, што на Андрэя паскардзіўся адзін са студэнтаў.


Палітвязьня асудзілі на 4,5 года калёніі за стварэньне закрытага дваровага тэлеграм-чату

У Віцебскім абласным судзе ў закрытым судовым працэсе на чатыры з паловай гады зьняволеньня асудзілі 36-гадовага палітвязьня Паўла Сакалова. Судзьдзя Яўген Буруноў прызнаў яго вінаватым па двух артыкулах Крымінальнага кодэксу: ч. 3 арт. 293 (навучаньне дзеля ўдзелу ў масавых беспарадках) і арт. 361-1 (стварэньне экстрэмісцкага фармаваньня). За кратамі Паўла трымаюць восем месяцаў, паведамляе «Вясна».

Даведацца падрабязнасьці справы палітвязьня амаль немагчыма: адвакат і жонка — пад падпіскай аб неразгалошваньні, а суд праходзіў у закрытым рэжыме. Вядома толькі, што падчас сьледчых дзеяньняў у тэлефоне Паўла знайшлі закрыты дваровы тэлеграм-чат, у якім знаходзіліся ўсяго тры чалавекі. У адным са сваіх паведамленьняў мужчына зрабіў рэпост відэа, якое было прызнанае «экстрэмісцкім», але ўжо пасьля яго затрыманьня.

За імправізаванае пахаваньне Лукашэнкі — да 4,5 года пазбаўленьня волі

У судзе Віцебскага раёну 20 траўня завяршыўся судовы працэс над палітвязьнямі Ірынай Пярцовай, Арцёмам Латышавым, Кацярынай Макарэвіч і Юліяй Лабуновай, вядомымі як удзельнікі «віцебскіх пэрформансаў», паведамляе «Вясна».

Іх затрымалі ў верасьні 2021 году, 7 месяцаў да суду яны правялі ў Віцебскім СІЗА. Іх судзілі паводле трох артыкулаў Крымінальнага кодэксу Беларусі: ч.2 арт. 339; ч.1 арт. 342; арт. 341.

У прыватнасьці, іх вінавацілі ў псаваньні банэра з выявамі супрацоўнікаў ДАІ, інсцэніроўцы «пахаваньня Аляксандра Лукашэнкі» на віцебскіх могілках «Арэхава», дэманстратыўным спаленьні дзяржаўных газэт і ў тым, што яны разьбілі імправізаваны тэлеэкран з наклееным партрэтам Грыгорыя Азаронка.

Судзьдзя Міхаіл Зубеня прысудзіў абвінавачаным наступныя тэрміны:

  • Ірыне Пярцовай — 2 гады калёніі агульнага рэжыму;
  • Юліі Лабуновай, Кацярыне Макарэвіч — 3,5 года калёніі агульнага рэжыму;
  • Арцёму Латышаву — 4,5 года калёніі агульнага рэжыму.
  • Ірыне Пярцовай — 2 гады калёніі агульнага рэжыму.

Прысуд журналістам «Нашай Нівы» Ягору Марціновічу і Андрэю Скурко пакінулі ў сіле

20 траўня Менскі гарадзкі суд разгледзеў апэляцыю на прысуд рэдактарам «Нашай Нівы» Ягору Марціновічу і Андрэю Скурко. Ён застаецца ў сіле: два з паловай гады калёніі.

Марціновіча і Скурко затрымалі 8 ліпеня 2021 году. Крымінальную справу супраць іх завялі паводле ч. 2 арт. 216 Крымінальнага кодэксу (прычыненьне маёмаснай шкоды без прыкмет крадзяжу, учыненае групай асобаў па папярэдняй змове або ў буйным памеры). Журналістаў судзілі па эканамічным артыкуле за аплату камунальных паслуг па тарыфах для фізычных, а не юрыдычных асоб.

Першапачаткова шкоду налічылі ў памеры 3500 рублёў. Потым гэтая сума вырасла да 10 тысяч. Марціновіч і Скурко пагасілі шкоду да суду, «Менскводаканал» і «Менскэнэрга» адклікалі пазовы.

Прысуд журналістам вынесьлі 15 сакавіка, цяпер яны ў турме ў Магілёве.

Прамысловага альпініста з Магілёўскай вобласьці затрымалі нібыта за рэгістрацыю ў пляне «Перамога»

Праўладныя тэлеграм-каналы паведамляюць пра затрыманьне 48-гадовага Паўла Якімюка. У «пакаяльным» відэа ён кажа, што ўвосень 2021 году зарэгістраваўся ў пляне «Перамога», бо быў ня згодны з вынікамі выбараў.

Як паведамляюць праваабаронцы «Вясны», паводле папярэдняй інфармацыі, Паўлу Якімюку інкрымінавалі артыкул 361-1 КК Беларусі («удзел у экстрэмісцкім фармаваньні»). Паводле гэтага артыкула можа пагражаць да 6 гадоў зьняволеньня.

Маладога настаўніка затрымалі за «ўдзел у пратэстах і ўцягваньне ў іх дзяцей»

Сілавікі напісалі пра затрыманьне 31-гадовага Андрэя Дараховіча. Ён працаваў настаўнікам гісторыі ў менскім Лінгвагуманітарным каледжы.

Андрэй мае жонку і дваіх дзяцей. Вядома, што яго затрымлівалі на акцыі 14 ліпеня 2020 году, калі людзі пратэставалі супраць незаконнай нерэгістрацыі кандыдатам у прэзыдэнты Віктара Бабарыкі. Сілавікі абвінавачваюць настаўніка ў рэгістрацыі ў пляне «Перамога», удзеле ў пратэстах і «ўцягваньні ў іх малалетніх дзяцей».

Два гады калёніі агульнага рэжыму за абразу Лукашэнкі

У судзе Полацку і Полацкага раёну 20 траўня вынесьлі прысуд па крымінальнай справе жыхаркі гарадзкога пасёлку Ветрына Сьвятланы Фірсавай. Яе абвінавацілі паводле ч.1 арт.368 Крымінальнага кодэксу за камэнтар «Дебил бл***ть» да відэа з прамовай Лукашэнкі, напісаны яшчэ ў 2021 годзе, паведамляе «Вясна».

У лютым Сьвятлане прысудзілі 200 базавых велічынь штрафу за «апаганьваньне збудаваньняў і псаваньне маёмасьці» (арт. 341 КК). Згодна з абвінавачаньнем, Фірсава зь іншай жанчынай наносілі надпісы і бел-чырвона-белыя выявы на слупах электраперадач, дрэвах, лаўках на прыпынках транспарту, асфальце.

Судзьдзя Ўладзімір Бясецкі прысудзіў Фірсавай два гады пазбаўленьня волі ў калёніі агульнага рэжыму і штраф па першым прысудзе 6400 рублёў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG