«За апошнія два дні мы зарэгістравалі сотні ваеннапалонных, якія пакідаюць завод „Азоўсталь“ у Марыюпалі. Улік ваеннапалонных — важная частка нашай працы. Вельмі важна, каб зь імі абыходзіліся па-чалавечы і з годнасьцю», — заявіў МКЧК у Twitter 19 траўня.
Міністэрства абароны Расеі заяўляе, што амаль 1000 украінскіх байцоў на заводзе «здаліся» па стане на 18 траўня, пакуль вядуцца перамовы аб лёсе яшчэ сотняў, якія, як мяркуецца, усё яшчэ знаходзяцца на «Азоўсталі».
Украінскі бок пакуль не камэнтуе заяў Масквы.
У заяве Чырвонага Крыжа гаворыцца, што бягучы працэс рэгістрацыі прадугледжвае дакумэнтаванне асабістых зьвестак, такіх як імя, дата нараджэньня і інфармацыя пра блізкіх сваякоў.
Гэта «дазваляе МКЧК адсочваць тых, хто быў захоплены, і дапамагае ім падтрымліваць сувязь са сваімі сем’ямі», — гаворыцца ў заяве.
У ім дадаецца, што, згодна з Жэнэўскімі канвэнцыямі, МКЧК мае права дапытваць ваеннапалонных «бяз сьведак» і што сустрэчы зь імі не павінны быць «залішне абмежаваныя».
18 траўня прэзыдэнт Украіны Ўладзімір Зяленскі падкрэсьліў, што ў Марыюпалі працягваецца апэрацыя па эвакуацыі з заводу «Азоўсталь».
У ноч на 17 траўня намесьніца міністра абароны Ганна Маляр пацьвердзіла пачатак апэрацыі выратаваньня ўкраінскіх вайскоўцаў, якія апынуліся ў пастцы на тэрыторыі «Азоўсталі». Паводле яе, адтуль у лячэбную ўстанову акупаванага Новаазоўску эвакуявалі 53 цяжка параненых. Яшчэ 211 чалавек былі дастаўленыя ў Аленеўку па гуманітарным калідоры.
Раней увечары 16 траўня камандзір палка «Азоў» Дзяніс Пракапенка заявіў, што абаронцы Марыюпаля выканалі загад па выратаваньні жыцьцяў. Парадку ён не ўдакладніў. Ён толькі паведаміў, што вайскоўцы Марыюпальскага гарнізону на працягу 82 дзён «стрымлівалі пераважная сілы праціўніка». Ён указаў на выкананьне «зацьверджанага рашэньня» «вышэйшага вайсковага камандаваньня».
Завод «Азоўсталь» стаў апошнім апорным пунктам абароны ўкраінскіх войскаў у Марыюпалі пасьля таго, як большая частка гораду перайшла пад кантроль расейскіх вайскоўцаў.
Раней прэзыдэнт Уладзімір Зяленскі заявіў, што Ўкраіна ня мае магчымасьці разблякаваць Марыюпаль ваенным шляхам.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
