Лінкі ўнівэрсальнага доступу

Пасьля ператрусу сілавікі затрымалі выдаўца Янушкевіча і супрацоўніцу кнігарні «Кнігаўка», забралі 200 кніг


Кнігарня «Кнігаўка» ў Менску 17 траўня
Кнігарня «Кнігаўка» ў Менску 17 траўня

Вядома, што Андрэй Янушкевіч пасьля ператрусу ноч правёў у Першамайскім РУУС.

Пасьля ператрусу ў новай кнігарні «Кнігаўка» зьнікла сувязь з дырэктарам Андрэем Янушкевічам і супрацоўніцай кнігарні Настай Карнацкай.

17 траўня стала вядома, што сілавікі затрымалі выдаўца Андрэя Янушкевіча і канфіскавалі ў яго 200 кніг, па 15 выданьнях будзе «праведзена экспэртыза», паведаміла супрацоўніца афіцыёзнага выданьня «СБ. Беларусь Сегодня» Людміла Гладкая.

Паводле якога артыкулу затрымалі Янушкевіча, невядома.

Затрыманы выдавец Андрэй Янушкевіч
Затрыманы выдавец Андрэй Янушкевіч

Паводле Гладкай, затрымалі і «касірку кнігарні», якая нібыта «адміністравала шэраг экстрэмісцкіх рэсурсаў». Гладкая цытуе размову на адкрыцьці кнігарні:

Андрэй Янушкевіч: «Мы займаем сваю нішу. Мы даем людзям чытаць добрую літаратуру на іх роднай мове. Гэта наша ніша». На што прапагандыстка Гладкая адрэагавала: «Ніша. Такая крыху нацыяналістычная».

Затрыманая Наста Карнацкая
Затрыманая Наста Карнацкая

Раніцай 16 траўня ў першы дзень працы «Кнігаўкі», туды прыехалі прапагандысты Рыгор Азаронак і Людміла Гладкая.

Яны чапляліся да ўласнікаў кнігарні за тое, што тыя прадаюць гістарычныя кнігі на беларускай мове. Іх пытаньні выклікала кніга пра род князёў Радзівілаў, а таксама кніга з фота, якое здалося Азаронку «вельмі падобным да параду ветэранаў СС» (у рэальнасці на здымку было ўступленне літоўскага войска ў Вільню ў 1939-м).

Дыялёгі Азаронка і Гладкай з Андрэем Янушкевічам можна пачытаць тут.

Пасьля абеду ў кнігарню прыйшлі сілавікі з ператрусам, паведаміла «Наша ніва».

Адкрыцьцё кнігарні «Кнігаўка» ў Менску
Адкрыцьцё кнігарні «Кнігаўка» ў Менску

Андрэй Янушкевіч ноч правёў у Першамайскім РУУС. Родныя спрабуюць высьветліць акалічнасьці. У судах няма інфармацыі, ці будуць разглядацца адміністрацыйныя справы Янушкевіча і Карнацкай.

Новая кнігарня адкрылася 16 траўня на вул. Зьмітрака Бядулі, 6 у Менску. Найперш гэта мелася быць выдавецкая кнігарня, дзе выдавецтва «Янушкевіч» будзе прадаваць свае кнігі і кнігі «блізкіх партнэраў», паведаміла выдавецтва ў сацсетках.

Адкрыцьцё кнігарні «Кнігаўка» ў Менску
Адкрыцьцё кнігарні «Кнігаўка» ў Менску

Выдавецтва «Янушкевіч» займаецца падрыхтоўкай і выданьнем разнастайнай кніжнай прадукцыі, пераважна на беларускай мове.

У студзені 2021 году Дэпартамэнт фінансавых расьсьледаваньняў Камітэту дзяржаўнага кантролю Беларусі забраў тэхніку і заблякаваў рахунак выдавецтва, а ў чэрвені выдавецтва атрымала паведамленьне пра магчымасьць ізноў карыстацца банкаўскім рахункам.

Кніжная крама Кнігаўка, дзе напярэдадні прайшоў вобшук. Выдаўца Андрэя Янушкевіча і супрацоўніцу кнігарні Насту Карнацкую затрымалі
Кніжная крама Кнігаўка, дзе напярэдадні прайшоў вобшук. Выдаўца Андрэя Янушкевіча і супрацоўніцу кнігарні Насту Карнацкую затрымалі

22 сакавіка стала вядома, што выдавецтва «Янушкевіч» папрасілі тэрмінова вызваліць офіс на Мар’еўскай, 7А у Менску. Пасьля гэтага выдавецтва абвясьціла распродаж кніг і хутка пад офісам сабралася вялізная чарга пакупнікоў, якая не сканчалася некалькі дзён.

Апошнім часам беларускія ўлады прыпынілі дзейнасьць адразу некалькіх беларускіх незалежных выдавецтваў: «Лімарыус», «Кнігазбор», «Галіяфы», «Мэдысонт».

Фармальнай падставай стала парушэньне «тэрмінаў звароту ў Міністэрства інфармацыі Рэспублікі Беларусь з паведамленьнем аб зьмене зьвестак, якія падлягаюць уключэньню ў Дзяржаўны рэестар выдаўцоў, вытворцаў і распаўсюджвальнікаў друкаваных выданьняў».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG