«Пра тое, што іх перакінуць на мяжу, стала вядома ў нядзелю, 3 красавіка. У панядзелак, 4 красавіка яны выехалі са Слоніма. Ужо даехалі, больш за суткі былі ў дарозе. Апасаюся, каб ня кінулі празь мяжу — ва Ўкраіну. Іншыя бацькі таксама пераймаюцца», — расказала маці вайскоўца.
Зь яе словаў, камандзіры патлумачылі «камандзіроўку» ўзмацненьнем мяжы, ратацыяй. «[Сказалі], што там былі раней іншыя кантрактнікі, цяпер іх замяняюць. Якія там умовы? Пакуль ня ведаю, ён рэдка выходзіць на сувязь. Камандзіры супакойвалі, маўляў, усё ў парадку, усе на месцы, ніхто нікуды не паедзе, гэта вучэньні», — кажа яна.
Беларуска дадала, што сын у курсе рэальнай сытуацыі. Кантрактнікі маюць тэлефоны і доступ у інтэрнэт. «Але ён спадзяецца, што гэта ўсё-ткі ўзмацненьне мяжы», — кажа маці.
У склад 11-й мэханізаванай брыгады ўваходзяць танкісты, мотастралкі, сувязісты, разьведчыкі, сапёры.
