Расею западозрылі ва ўжываньні забароненай зброі ў Чарнігаве

10 сакавік 2022, 21:48

Меркаваныя рэшткі расейскай запальнай бомбы ОФЗАБ-500 у Чарнігаве, Украіна.

Расейскае войска магло выкарыстоўваць запальныя бомбы пры нападзе на Чарнігаў, парушыўшы тым самым міжнародную канвэнцыю.

Такую выснову зрабіла дасьледчая група Conflict Intelligence Team, якая вывучыла фота-і відэа-запісы ўкраінскай Дзяржаўнай службы па надзвычайных сытуацыях.

На іх дасьледчыкі выявілі фрагмэнты аскепкава-фугасна-запальнай авіябомбы расейскай вытворчасьці ОФЗАБ-500 і адну неразарваную бомбу такога ж тыпу.

Пратэст украінцаў, якія жывуць у Лібане, супраць расейскай агрэсіі, разьвязанай супраць іх радзімы. Бэйрут, побач з амбасадай Расеі, 9 сакавіка 2022

ГЛЯДЗІЦЕ ТАКСАМА:

Уночы бамбавалі Ахтырку; аднавіліся абстрэлы Марыюпалю. Як пачаўся трэці тыдзень вайны Расеі супраць Украіны

Прымяненьне запальнай зброі побач з жылымі зонамі забаронена дадатковым пратаколам да Канвэнцыі аб забароне або абмежаваньні прымяненьня Канкрэтных відаў звычайнай зброі, якая наносіць празьмерныя пашкоджаньні або мае невыбарчае дзеяньне.

CIT зьвяртае ўвагу, што раней у Чарнігаве быў зьбіты расейскі самалёт Су-34, які, як мяркуецца, нёс такія бомбы. Аднак тады нельга было даказаць, што войска зьбіралася прымяняць іх у жылой забудове.

Савецкі саюз, а пазьней Расея ратыфікавалі ўсе пратаколы да Канвэнцыі 1980 года, у тым ліку аб забароне запальнай зброі, аскепкаў, якія нельга выявіць рэнтгенам, невыяўленых мін, мін-пастак і асьляпляльных лазэраў.
Парушэньне канвэнцыі можна расцаніць як ваеннае злачынства, акрамя таго прымяненьне забароненых сродкаў вайны забаронена расейскім Крымінальным кодэксам.