Учора падчас прэсавай канфэрэнцыі Сьвятлана Ціханоўская заклікала беларусаў сабрацца на антываенную акцыю на прывакзальных плошчах гарадоў 28 лютага а 18-й гадзіне.
На гэты момант праваабаронцы паведамляюць аб затрыманьнях каля чыгуначнага вакзалу ў Менску 29-гадовай Жанны Антонавай і Дар’і Мядзьведзь.
Відавочцы перадаюць, што там сабралася шмат тэхнікі. Сілавікі затрымліваюць людзей, якія скандуюць «Не — вайне!»
52-гадовага менчука пакаралі «суткамі» за спробу сфатаграфаваць бюлетэнь
У судзе Партызанскага раёну сёньня разглядзелі справу 52-гадовага Мікалая Хадасевіча, піша «Вясна». З словаў мужчыны, разам з жонкай яны прыехалі на выбарчы ўчастак прагаласаваць. Мікалай вырашыў сфатаграфаваць бюлетэнь. Гэта заўважылі назіральнікі на ўчастку і патрабавалі паказаць ім тэлефон. Мужчына пагадзіўся і быў адразу затрыманы.
Аднак сьведка-міліцыянт сьцьвярджае, што на Хадасевіча склалі пратакол паводле арт. 24.23 КаАП за тое, што ён на вуліцы выгукаў лёзунгі «Нет войне», «Нет насилию» і «Нет незаконному референдуму». Судзьдзя Міхаіл Макарэвіч пакараў мужчыну 15-дзённым арыштам.
Прайшоў суд над магілёўскім журналістам Алесем Сабалеўскім
Тэлеграм-канал Mayday паведамляе, што журналіста Алеся Сабалеўскага асудзілі . Але прысуд пакуль невядомы.
Жыхара Івейскага раёну асудзілі на 2,5 года калёніі па чатырох артыкулах
Праваабаронцам стала вядома пра вынікі судовага паседжаньня ў справе Уладзімера Сільвановіча, якое прайшло ў Іўі.
Мужчыну абвінавачвалі адразу па чатырох артыкулах:
- ч. 3 арт. 203 «Незаконныя дзеяньні ў дачыненьні да інфармацыі аб прыватным жыцьці і пэрсанальных зьвестак»
- арт. 370 «Зьдзек зь дзяржаўных сымбаляў»
- арт. 369 «Абраза прадстаўніка ўлады»
- ч. 1 арт. 368 «Абраза прэзыдэнта Рэспублікі Беларусі»
Вядома, што Уладзімера абвінавацілі ў 8 эпізодах абразаў — мужчына пакінуў зьняважлівыя камэнтары ў «Одноклассниках» у адрас прадстаўнікоў улады , а таксама распаўсюдзіў іх пэрсанальныя зьвесткі. Пра дэталі абвінавачаньня па іншых артыкулах нічога не вядома.
Судзьдзя Марыя Каханоўская прысудзіла Сільвановічу 2,5 года калёніі, а таксама выплату пацярпелым 4000 рублёў.
