«Эстонія далучаецца да ініцыятывы Польшчы і забараняе ўсім расейскім авіякампаніям выкарыстоўваць нашу паветраную прастору», — цытуе міністра ERR.
Усьлед за Эстоніяй паветраную прастору для расейскіх авіякампаніяў закрывае і Латвія, заявіў міністар юстыцыі Яніс Борданс.
«Брутальная атака рэжыму Пуціна на ўкраінскую дэмакратыю і свабоду недаравальная. Захад павінен ізаляваць Расею як эканамічна, гэтак і палітычна. Эстонія забараняе ўваход у сваю паветраную прастору расейскім авіякампаніям. Польшча і Чэхія гэта ўжо зрабілі, і мы заклікаем усе краіны ЭЗ зрабіць тое самае», — напісала прэм’ер-міністар Эстоніі Кая Калас у Facebook.
Пасьля гэтых паведамленьняў латвійская авіякампанія AirBaltic абвясьціла пра скасаваньне ўсіх рэйсаў у Расею да 26 сакавіка. Польскі перавозьнік LOT таксама абвясьціў аб адмене рэйсаў у Маскву і Санкт-Пецярбург.
У чацьвер прэмʼер-міністар Вялікай Брытаніі Борыс Джонсан заявіў аб увядзеньні санкцыяў супраць кампаніяў «Аэрофлот», «Ростех» і расейскіх банкаў, у тым ліку ВТБ, пасьля чаго «Росавиация» забараніла брытанскім самалётам палёты ў Расею.
У пятніцу ў Чэхіі прайшло пасяджэньне Камітэту дзяржаўнай бясьпекі на фоне працяглай ваеннай агрэсіі Расеі ва Ўкраіне. Пасьля яго заканчэньня прэмʼер-міністар Пэтар Фіяла заявіў, што ўрад вырашыў прыпыніць выдачу ня толькі візаў, але і відаў на жыхарства ў Чэхіі для грамадзян Расеі.
