«Вельмі важна, што сёньня мы, скажу вельмі дыпляматычна, гаварылі ня толькі пра тое, што Нямеччына ня можа зрабіць з тых ці іншых прычын, але і пра тое, што Нямеччына можа зрабіць, і пра тое, што яна мае намер зрабіць для падтрымкі Ўкраіны канкрэтна ў сфэры абароны і бясьпекі», — сказаў Дзьмітро Кулеба 7 лютага пасьля сустрэчы ў Кіеве зь міністрам замежных спраў Нямеччыны Анналенай Бэрбак.
Украінскі міністар падкрэсьліў, што размова была максымальна шчырай, нягледзячы на розныя пазыцыі. «Наша задача палягае ня ў тым, каб сварыцца, а ў тым, каб знайсьці рашэньні. І я мяркую, што сёньня мы знайшлі праект рашэньня. Цяпер будзем чакаць крок ад нямецкага ўраду», — дадаў Дзьмітро Кулеба.
У сваю чаргу, Анналена Бэрбак дадала, што Нямеччына робіць «вялікі ўнёсак у бясьпеку Ўкраіны». Яна паведаміла пра намер даць крэдыт для ажыцьцяўленьня рэформаў, рэалізацыі праектаў у сфэры энэргетычнай бясьпекі і кібэрбясьпекі.
«Магчымы напад ня толькі ў вайсковым пляне, але таксама і кібэратака, і спыненьне падачы энэрганосьбітаў — гэта таксама кепска, як і танкавая атака», — патлумачыла міністар замежных спраў Нямеччыны.
На думку Дзьмітра Кулебы, для Расеі базавым зьяўляецца сцэнар унутранай дэстабілізацыі сытуацыі ва Ўкраіне. «Для гэтага Расея выкарыстоўвае вайсковую эскаляцыю, кібэратакі, распаўсюджвае дэзынфармацыю, і спрабуе забіць клін у дачыненьні Ўкраіны і яе міжнародных партнэраў. А гэта робяць зараз як Расея, так і прарасейскія палітыкі ў адпаведных краінах, дадаючы ціск зь іншага боку», — дадаў міністар замежных спраў Украіны. Ён не ўдакладніў, якіх палітыкаў меў на ўвазе.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
