Омікрон-штам каранавірусу становіцца самым распаўсюджаным у Беларусі. Пра гэта расказала першая намесьніца міністра аховы здароўя Алена Краткова, паведамляе агенцтва «Минск-Новости».
«Паводле зьвестак эпідэміёлягаў за апошні тыдзень, сярод штамаў, якія цыркулююць па горадзе Менску, больш за 50%, — гэта ўжо „Омікрон“. Па рэгіёнах удзельная вага „Омікрону“ крыху ніжэйшая, але гэта справа часу. Таму „Омікрон“ у нас ёсьць, і пакуль нельга сказаць, што ён адзіны (таксама цыркулююць „Дэльта“ і грып)», — расказала спэцыялістка.
Пры гэтым упершыню «Омікрон» афіцыйна зарэгістравалі ў Беларусі толькі ў канцы сьнежня.
Паводле Кратковай, штам мае пэўныя адрозьненьні ад папярэдніх варыянтаў, у прыватнасьці ад «Дэльты».
«Ён мае меншую патагеннасьць, але больш высокую кантагіёзнасьць, гэта значыць распаўсюджваецца хутчэй, чым „Дэльта“», — растлумачыла Алена Краткова.
Яна дадала, што вялікая колькасьць мутацый, якія адбыліся ў спайк-бялку (гэта бялок-шып, якім вірус чапляецца за клетку, за рэцэптар), дазваляе яму абыходзіць імунную абарону.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў