Жанчыну, якую летась пакаралі двума гадамі хатняй «хіміі» за эмодзі «какашкі», зноў судзяць. Пра пачатак чарговага судовага паседжаньня ў дачыненьні да жыхаркі Івацэвічаў Вольгі Кронды, якая адна гадуе дзіця, паведамляе «Ганцавіцкі час».
У жніўні 33-гадовую Вольгу Кронду ўжо судзілі за абразу міліцыянта Івацэвіцкага РАУС Руслана Куцко. Справу на просьбу пацярпелага разглядалі ў закрытым працэсе . Тады падставай для перасьледу сталі некалькі смайлікаў «какашка», якія жанчына пакінула пад фатаздымкам Куцко.
Суд пакараў яе двума гадамі хатняй «хіміі», таксама яна мусіць выплаціць сілавіку 2000 рублёў у якасьці маральнай кампэнсацыі.
Вольга абскардзіла гэты прысуд, але 28 верасьня абласны суд пакінуў яго ў сіле.
Жанчына папрасіла суд даць ёй магчымасьць выплачваць кампэнсацыю міліцыянту ў растэрміноўку, бо ня мае такіх грошай. Яна працуе рамесьніцай, гадуе чатырохгадовую дачку.
Сьледчы выдаў Вользе Крондзе пастанову пра абмежаваньне выезду за межы Беларусі. Хаця выезд і так быў абмежаваны яшчэ ў красавіку ў сувязі з адбыцьцём ёю «хіміі».
Аднак праз час стала вядома, што на жанчыну завялі чарговую крымінальную справу, паводле 369-га артыкулу, за зьнявагу таго ж самага міліцыянта.
Летась у жніўні ў дакумэнце паведамлялася, што 3 і 4 жніўня, знаходзячыся ў кватэры, праз тэлефон у тэлеграм-канале «Салідарнасьць. Івацэвічы» яна разьмясьціла публікацыі, якія «прыніжаюць гонар і годнасьць асобы прадстаўніка ўлады, опэрупаўнаважанага Івацэвіцкага РАУС Руслана Куцко ў сувязі з выкананьнем ім службовых абавязкаў».
«Калі мне вынесьлі прысуд у жніўні ў івацэвіцкім судзе, я пакінула 4 жніўня ў тэлеграм-канале зварот да гэтага Куцко і напісала, што ён «абаср...ся і абняславіўся». 19 жніўня днём мяне зь дзіцем вылавілі ў горадзе, у банку, пасадзілі ў машыну, прывезьлі дадому, зрабілі ператрус. Зноў забралі тэлефон на экспэртызу, — тлумачыла раней Вольга.
На пачатку кастрычніка 2021 году яе выклікалі на допыт. Вольга адмовілася ад дачы паказаньняў.
Паседжаньне ў новай крымінальнай справе ў Вольгі пачалося ўчора. Праходзіла яно зноў у закрытым рэжыме, пра што папрасіў Руслан.
Траіх менчукоў асудзілі да 2 гадоў «хіміі» за «счэпку» на акцыі пратэсту пасьля выбараў
У судзе Савецкага раёну Менску 17 студзеня да 2 гадоў «хіміі» за ўдзел у акцыі пратэсту пасьля выбараў асудзілі траіх менчукоў. Судзьдзя Алена Жуковіч асудзіла палітвязьня Мікіту Саснова, Аляксея Кандраценку і Ягора Ж. па арт. 342 Крымінальнага кодэксу (удзел у дзеяньнях, якія груба парушаюць грамадзкі парадак), піша «Вясна».
Усе трое фігурантаў справы на судзе прызналі віну. Галоўны доказ іх віны — фатаздымак з Інстаграму фатографа, які быў апублікаваны на многіх казахстанскіх сайтах.
Усе трое былі пад вартай у СІЗА-1 па некалькі месяцаў, а пасьля абвяшчэньня прысуду іх вызвалілі ў залі суда да накіраваньня ў папраўчую ўстанову адкрытага тыпу.
МУС прызнала «экстрэмісцкім фармаваньнем» гомельскі ютуб‑канал «Трэці Рэгіён Беларусь»
Ютуб-канал «Трэці Рэгіён Беларусь» пазначаны ў сьпісе тых, хто мае дачыненьне да экстрэмізму, заўважыла «Медыязона».
На момант публікацыі канал налічваў 393 падпісанты. На ім публікаваліся відэа з акцыяў пратэсту ў Беларусі і мітынгаў у Кіеве. Апошні відэазапіс апублікаваны 20 жніўня 2021 году.
4 студзеня супрацоўнікі ГУБАЗіК затрымалі стваральніка каналу Алега Канавалава. Вядома, што Алег у 2020 годзе пераехаў ва Ўкраіну. На навагоднія сьвяты ён прыехаў у Беларусь, дзе яго і затрымалі.
Супраць яго завялі крымінальную справу аб распальваньні сацыяльнай варожасьці (артыкул 130 КК). МУС паведаміла, што Канавалаў зь лета 2020 году «актыўна ўдзельнічаў у пратэстным руху, здымаў і разьмяшчаў відэа на сваім канале, дэананімізаваў сілавікоў». Пасьля пераезду ва Ўкраіну разьмяшчаў у сацсетках інфармацыю «антыдзяржаўнага кшталту», «прапагандаваў узброены супраціў прадстаўнікам улады і супрацоўнікам праваахоўных органаў», а таксама «цынічна выказваўся ў камэнтарах аб гібелі супрацоўніка КДБ».
Сайты «Віцебскі кур’ер» і «Наш дом» прызналі «экстрэмісцкімі матэрыяламі»
Матэрыялы сайту Міжнароднага цэнтру грамадзянскіх ініцыятываў «Наш дом», сайту выданьня «Віцебскі курʼер news», а таксама тэлеграм-каналу і чату «Віцебскага курʼера» прызналі «экстрэмісцкімі матэрыяламі». Адпаведнае рашэньне прыняў суд Чыгуначнага раёну Віцебску 14 студзеня.
Летась у сьнежні доступ да гэтых сайтаў быў абмежаваны. Як паведамляла Генпракуратура, на сайце «Наш дом» «агрэсіўна і бяздоказна крытыкаваліся грамадзка-палітычная сытуацыя ў Беларусі і яе кіраўніцтва». На сайце «Віцебскага курʼера» выявілі публікацыю «інфармацыі, якая ганіць дзелавую рэпутацыю і дыскрэдытуе дзяржаўныя органы і іх службовых асобаў».
У Полацку выставілі абвінавачаньне Андрэю Корабаву
Андрэй Корабаў — адзін з двух затрыманых 18 лістапада 2021 году братоў. Тады яму прысудзілі 15 сутак арышту. Цяпер яго абвінавачваюць у абразе Лукашэнкі (арт. 368 Крымінальнага кодэксу), паведамляе «Вясна».
Выйшла на волю кіраўніца арганізацыі «Геном»
30-гадовую дырэктарку «Генома» Дар’ю Царык затрымалі ў Менску 13 студзеня. Супрацоўнікі ГУБАЗІКу правялі ў яе кватэры ператрус, а потым павезьлі на допыт. У Першамайскім РУУСе на яе склалі пратакол па адміністрацыйнай справе і асудзілі на 8 сутак. Сёньня яна выйшла на волю.
Дар’я Царык — дырэктарка «Генома», арганізацыі, якая займаецца дапамогай людзям з рэдкімі генэтычнымі нэўра-цяглічнымі захворваньнямі. Яна таксама ўваходзіць у кіраўніцтва арганізацыі «Радзіслава», якая дапамагае жанчынам і дзецям, што сталі ахвярамі хатняга гвалту.
