Лінкі ўнівэрсальнага доступу

Трох палітвязьняў «памілавалі»: пакараньне з «хіміі» зьмянілі на «хатнюю хімію»


11 студзеня стала вядома, што палітвязьню Юрыю Вяршуку па памілаваньню зьмянілі пакараньне з «хіміі» на «хатнюю хімію».

Праваабаронцам «Вясны» таксама стала вядома, што акрамя палітвязьняў Уладзіміра Шурубейкі і Яраслава Збароўскага, 5 студзеня з «хіміі» на «хатнюю хімію» таксама перавялі палітзьняволенага Юрыя Вяршука. Пакараньне на больш мяккае ім замянілі ў выніку памілаваньня.

Гамяльчука Юрыя Вяршука асудзілі на два гады «хіміі» за зьневажальны камэнтар пад відэа, на якім старшыня Гомельскага аблвыканкама Салавей адказвае на пытаньні грамадзян. Сваё пакараньне ён адбываў у ПУАТ № 36.

Што такое «хімія» і «хатняя хімія»

«Хімія» — адбыцьцё пакараньня абмежаваньнем волі ў папраўчай установе адкрытага тыпу. Выраз зьявіўся ў СССР у пасьляваенныя часы, калі працу асуджаных пачалі актыўна выкарыстоўваць на будоўлях і шкодных вытворчасьцях (у тым ліку на хімічных прадпрыемствах). У Беларусі 29 папраўчых установаў адкрытага тыпу, або «хіміяў».

Праз пакараньне «хіміяй» прайшоў шмат хто зь беларускіх апазыцыянэраў.

«Да мяне маглі прыяжджаць наведнікі, мы сустракаліся і размаўлялі ў дворыку спэцкамэндатуры. Карыстаўся мабільным тэлефонам, даходзілі лісты, я пісаў з „хіміі“ нататкі... Некалькі разоў дазвалялі зьезьдзіць да бацькоў», — згадваў Павал Севярынец пра сваю «хімію» ў Пружанскім раёне, дзе працаваў на складзе мясцовай гаспадаркі.

«Хіміяй» часта заканчваюцца адседкі вязьняў, якія былі асуджаныя на вялікія тэрміны зьняволеньня, але праз добрыя паводзіны заслужылі палёгку.

Пакараньне «абмежаваньнем волі» магчыма адбыць і на так званай «хатняй хіміі» — калі ў прысудзе выкарыстоўваецца фармулёўка «без накіраваньня ў папраўчую ўстанову адкрытага тыпу». Фактычна гэта сумесь «хіміі», якая прадугледжвае абавязковую прымусовую працу, і адбыцьця пакараньня з адтэрміноўкай, калі асуджаны знаходзіцца дома, але пад рэгулярным пільным кантролем міліцыі.

10 відаў няволі: гід па беларускіх турмах

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG