Лінкі ўнівэрсальнага доступу

Што падаражэе з новага году і якія новыя падаткі ўвядуць


Ілюстрацыйнае фота

Глядзім, за што давядзецца плаціць больш і якімі новымі падаткамі ўлады абкладуць беларусаў налета.

Падаткі

Падатак на кватэру

Сёлета ўлады прынялі закон, які абавязвае плаціць падатак нават за адну кватэру, калі яна ва ўласнасьці. Выняткі толькі для пэнсіянэраў, інвалідаў I і II групы, непаўналетніх, недзеяздольных, вайскоўцаў, удзельнікаў Другой сусьветнай вайны.

Паведамлялі, што ў Менску гэты падатак будзе ў сярэднім 50 рублёў на год, у рэгіёнах — каля 25 рублёў.

Налічваць падатак будуць штогод, першы раз яго давядзецца сплаціць не пазьней за 15 лістапада 2022 году (аванс), рэшту — да 15 лістапада 2023-га.

Падатак на дадатковую вартасьць для замежных кампаніяў

Цяпер замежныя кампаніі, такія як Aliexpress, Ozon, Wildberries, не аплочваюць ПДВ, адпраўляючы тавары ў Беларусь. Згодна з інфармацыяй ад Мінфіну, гэтая норма можа зьмяніцца зь ліпеня 2022 году.

Стаўка ПДВ — 20%. Незразумела толькі, хто менавіта будзе аплочваць новы падатак: беларусы, якія замовілі тавар, ці кампаніі, якія яго адправілі ў Беларусь.

Зьмены для ІП

У Беларусі з новага году моцна абмяжоўваюць ужываньне спрошчанай сыстэмы падаткаабкладаньня для ІП (замест 6% мусяць плаціць 16%)

Міністэрства падаткаў і збораў забараніла з 1 студзеня 2022 году стасаваць спрошчаную сыстэму падаткаабкладаньня да індывідуальных прадпрымальнікаў, якія аказваюць паслугі.

Пад забарону не трапляюць ІП, якія аказваюць паслугі ў наступных сфэрах:

  • турыстычнай дзейнасьці;
  • аховы здароўя;
  • наземнага транспарту;
  • грамадзкага харчаваньня;
  • кампутарнага праграмаваньня.

Можа вырасьці падатак на прыбытак

Зьмены ў Падатковым кодэксе надаюць абласным і Менскаму гарадзкому саветам права павялічваць стандартную стаўку падатку на прыбытак з 18% на 2 працэнтныя пункты для платнікаў гэтага падатку ў мясцовы бюджэт.

Вырастуць зборы з рамесьнікаў

З 2022 году стаўку для рамесьнікаў адвяжуць ад базавай велічыні і замацуюць канкрэтную суму — 62 рублі ў год. Залежна ад інфляцыі яе будуць індэксаваць. Цяпер тыя, хто займаецца рамеснай дзейнасьцю, плацяць дзьве базавыя велічыні — 58 рублёў.

Што падаражэе

Камуналка

Зь першага студзеня вырастуць тарыфы на жыльлёва-камунальныя паслугі. Падаражэюць вада (халодная і гарачая), капітальны рамонт, прыбіраньне ў падвалах, абслугоўваньне ліфтаў і вываз сьмецьця — на 11 рублёў 10 капеек. Налета «камуналка» будзе расьці ў некалькі этапаў: пасьля студзеньскага падаражаньня расцэнкі павялічаць з 1 чэрвеня. На 3 рублі 4 капейкі павінны падаражэць ацяпленьне, газ і сьвятло.

Хатні інтэрнэт і тэлефон

Сёлета «Белтэлекам» некалькі разоў анансаваў рост тарыфаў, а пасьля пераносіў яго. Урэшце з 1 студзеня інтэрнэт падаражэе на 4%, сувязь — на 5%.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG