Прыбытак ад штрафных санкцый амаль на 50 мільёнаў рублёў (больш за 20 мільёнаў даляраў у эквіваленце) перавысіў першапачатковы плян уладаў.
Гэта вынікае з удакладненьня асобных паказьнікаў рэспубліканскага бюджэту на 2021 год, апублікаванага на Нацыянальным прававым інтэрнэт-партале.
У першапачаткова ўхваленым праекце бюджэту-2021, зьмешчаным на сайце Міністэрства фінансаў, меркавалася сабраць штрафамі 90 мільёнаў рублёў. Аднак на справе выйшлі ў плюс на 49 мільёнаў 753 тысячы (за выняткам 463 тысяч рублёў, якія так і не ўдалося спагнаць з заработнай платы асуджаных і асобаў, вызваленых з-пад крымінальнай адказнасьці).
Такім чынам, агульная сума, якая трапіла ў бюджэт ад штрафных санкцый, склала амаль 140 мільёнаў рублёў.
У гэтай лічбе значны ўнёсак штрафаў і іншых фінансавых спагнаньняў зь фігурантаў адміністрацыйных і крымінальных спраў за леташнія акцыі пратэсту, кампэнсацыі за збой руху грамадзкага транспарту, рэпосты матэрыялаў, нават падабайкі пад публікацыямі ў сацсетках.
