На праведзеным у сталіцы Літвы мастацкім аўкцыёне ў падтрымку беларускіх палітвязьняў і іх сем’яў сабралі 8 тысяч эўра. Пра гэта паведамляе сайт Delfi.lt.
Аўкцыён праводзіўся ў віленскай галерэі Саюзу мастакоў Літвы, а таксама ў інтэрнэце. Было прададзена амаль 40 твораў мастацтва. Грошы, пасьля выплаты падаткаў, пойдуць палітычным вязьням і іх семʼям у Беларусі.
«Падтрымка, атрыманая дзякуючы мастакам і знатакам мастацтва, зьяўляецца сымбалем таго, што злачынствы рэжыму не забыты, і мы шчыра клапоцімся аб адважных людзях Беларусі, нашых суседзях, якія змагаюцца за сваю свабоду», — сказала старшыня Літоўскага мастацкага таварыства Эгле Ганда Багданіене.
Адной з апякунак аўкцыёну была Сьвятлана Ціханоўская.
13 сьнежня ў Вільні прайшоў папярэдні аўкцыён, на якім пакупнікі набывалі жывапіс, кераміку і іншыя работы, сабраўшы такім чынам грошы для тых, каго трымаюць у турмах з палітычных прычын.
Тады за 12 тысяч эўра прадалі 33 творы беларускіх і літоўскіх мастакоў, паведаміў дабрачынны фонд BySol. Аўкцыён зладзіў офіс дэпутата Эўрапарлямэнту Пятраса Аўштравічуса, літаратурнае аб’яднаньне мастакоў пад патранатам старшыні Сойму Літвы Вікторыі Чміліце-Нільсэн і лідэркі беларускай апазыцыі Сьвятланы Ціханоўскай.
У Беларусі на 26 сьнежня 955 палітвязьняў. Шмат людзей вымушана ўцяклі за мяжу, нярэдка зь сем'ямі, каб уратавацца ад рэпрэсій.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў