Лінкі ўнівэрсальнага доступу

На фоне масавых звальненьняў «нядобранадзейных» Менску не хапае 2 тысяч мэдыкаў


Менская абласная клінічная бальніца падчас эпідэміі COVID-19.

У Менску не хапае мэдыкаў, колькасьць вакансій працягвае расьці. На 1 сьнежня сталічныя мэдустановы шукалі 997 мэдсясьцёр (+17%) і 835 дактароў (+11%).

Пры гэтым вядома шмат выпадкаў звальненьня лекараў за палітыку. А Лукашэнка нядаўна даручыў «разабрацца» з кіраўнікамі ўстаноў аховы здароўя, якія займаюць нібыта «антыдзяржаўную пазыцыю».

У Менску найбольш запатрабаваныя мэдыкі, інжынэры, спэцыялісты ў сфэры адукацыі і культуры

Камітэт працы, занятасьці і сацыяльнай абароны Менгарвыканкаму апублікаваў статыстыку занятасьці насельніцтва за студзень–лістапад.

На 1 сьнежня наймальнікі заявілі ў службу занятасьці насельніцтва амаль 25 тысяч вакансій рознага профілю. Гэта пры тым, што афіцыйна ўзровень зарэгістраванага беспрацоўя ў Менску не перавышае 0,1% ад колькасьці эканамічна актыўнага насельніцтва — на ўліку ўсяго 788 чалавек.

Найбольшы попыт у рабочых кадрах на будаўнічыя прафэсіі: муляр, тынкар, плітачнік, мантажнік будаўнічых канструкцый, сьлесар-сантэхнік, сталяр, электрагазазваршчык.

Гэтаксама бракуе кадраў у сфэры гандлю і грамадзкага харчаваньня, транспарту, прамысловасьці.

Зь пераліку спэцыялістаў найбольш запатрабаваныя мэдычныя работнікі: мэдсястра, лекар, правізар, рэнтгеналябарант, фэльчар.

Сярод дэфіцытных кадраў таксама фігуруюць інжынэрныя работнікі, спэцыялісты ў галіне адукацыі і культуры (артыст, бібліятэкар, выхавальнік, мэтадыст, выкладчык), адміністратары, бугальтары, мэнэджары, кіраўнікі арганізацый і іх структурных падразьдзяленьняў.

Бракуе 1000 мэдычных сясьцёр і амаль тысяча дактароў

Агулам у Менску не хапае амаль 1000 мэдычных сясьцёр, 835 лекараў, больш за 140 фэльчараў ды іншых. Таксама ў сталіцы свабодныя вакансіі для 780 інжынэраў, 230 выхавальнікаў, 115 настаўнікаў. Пры гэтым вядома пра масавыя зачысткі «нядобранадзейных» у дзяржаўных арганізацыях, якія найбольш закранулі мэдыцыну, чыгунку, мэдыя, установы культуры.

На падставе падрыхтаваных сьпісаў людзей прымушаюць звальняцца пры згодзе бакоў за любую праяву грамадзянскай пазыцыі — ад подпісаў за альтэрнатыўных кандыдатаў у прэзыдэнты да публічнага асуджэньня гвалту сілавікоў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG