Лінкі ўнівэрсальнага доступу

Вуліцу ў Вашынгтоне, дзе знаходзіцца амбасада Беларусі, прапанавалі назваць імем Рамана Бандарэнкі


Вуліцу ў сталіцы ЗША каля будынку амбасады Беларусі могуць назваць у гонар забітага беларускага пратэстоўца Рамана Бандарэнкі.

З ініцыятывай выступіла беларуская дыяспара ў Вашынгтоне. У Facebook за гэта прагаласавалі больш за 300 чалавек.

Далей ініцыятыву падтрымаў тамтэйшы раённы камітэт. Наступны крок — разгляд прапановы ў Радзе акругі Калюмбія.

Цяперашні адрас амбасады Беларусі ў ЗША: 1619 New Hampshire Avenue NW Washington.

Даваць вуліцам сымбалічныя імёны дысыдэнтаў і ахвяраў рэжымаў, амбасады якіх там знаходзяцца, ужо сталася традыцыяй у Вашынгтоне. Там ужо ёсьць плошча Барыса Нямцова, праезд Джамаля Хашокджы і плошча Лю Сяобо. У Вашынгтоне сымбалічнае перайменаваньне магчымае не раней за другую гадавіну з дня сьмерці чалавека. Прадстаўнікі беларускай дыяспары спадзяюцца паскорыць працэс.

Раман Бандарэнка памёр у шпіталі ў лістападзе 2020 году пасьля таго, як яго пабілі на «плошчы Перамен» у Менску. Расьсьледаваньне справы ўладамі прыпынена: сьледчыя нібыта «не змаглі вызначыць падазраваных», хаця іх прозьвішчы ўжо названыя ў інтэрнэце.

Што вядома пра сьмерць Рамана Бандарэнкі

Раман Бандарэнка
Раман Бандарэнка
  • Невядомыя ў масках пачалі зразаць бел-чырвона-белыя стужкі ў двары на вуліцы Чарвякова ўвечары 11 лістапада.
  • Пасьля вэрбальнага канфлікту зь мясцовымі жыхарамі невядомыя пачалі нападаць і біць жыхароў. Каля 22:16 некалькі чалавек забралі і зьвезьлі на бусах, падобных да тых, якімі карыстаюцца сілавікі.
  • Паводле непацьверджанай інфармацыі, каля 1,5 гадзіны Бандарэнка знаходзіўся ў Цэнтральным РУУС Менску.
  • У 0:05 Раман Бандарэнка паступіў у лякарню хуткай мэдычнай дапамогі зь вялікім ацёкам мозгу, закрытай чэрапна-мазгавой траўмай, субдуральнымі гематомамі, ударамі, абдзірынамі.
  • Паводле лекараў, ён быў у затарможаным стане, але ў апэрацыйную яго ўжо прывезьлі ў коме. Апэрацыя цягнулася некалькі гадзін.
  • Раман быў у крытычным стане.
  • ​ГУУС Менгарвыканкаму сьцьвярджае, што міліцыя прыбыла на месца толькі пасьля здарэньня. Рамана знайшлі непрытомнага і выклікалі хуткую. Адзін са сьведак здарэньня расказаў Свабодзе, што міліцыя прыяжджала яшчэ тады, калі невядомыя зразалі стужкі, «аднак хутка зьехала, нічога не зрабіўшы».
  • Сьледчы камітэт заявіў, што мужчына быў пʼяны. Аднак мэдыкі гэтую заяву абверглі — у крыві Бандарэнкі алькаголю не было.
  • 19 лістапада затрымалі журналістку Tut.by Кацярыну Барысевіч і лекара Арцёма Сарокіна. Кацярына Барысевіч была аўтаркай артыкула, дзе гаварылася, што ў крыві загінулага Рамана Бандарэнкі не было алькаголю. Інфармацыю пра гэта ёй перадаў лекар Арцём Сарокін. Пачатак суду над імі прызначаны на 19 лютага.
  • 18 лютага 2021 году, на соты дзень пасьля сьмерці Рамана, Генпракуратура паведаміла яго маці Алене Бандарэнцы, што па факце сьмерці яе сына пачалі крымінальную справу.
  • 17 верасьня 2021 справу прыпынілі«з прычыны неўстанаўленьня асобы, якая падлягае прыцягненьню ў якасьці абвінавачанага».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG