У фільме 16 галасоў беларусаў, якія трапілі ў жорны рэпрэсій падчас масавых пратэстаў 2020 году. У анатацыі аўтары напісалі:
«У фільме прадстаўлены зорны склад расейскіх і беларускіх актораў і палітыкаў, якія сабраліся разам, каб выказаць сваю салідарнасьць з палітычнымі зьняволенымі ў Беларусі, якіх зьбівае і забівае цяперашні нелегітымны рэжым, які прайграў прэзыдэнцкія выбары ў 2020 годзе, але не адмовіўся ад улады».
Аўтар фільму Андрэй Курэйчык напісаў у сваёй прадмове:
«Упершыню я напісаў п’есу, у якой я цалкам адхіліў як любы аўтарскі тэкст, так і любую спробу стылізацыі або інтэрпрэтацыі фактаў, якія ляжаць у аснове тэксту. Часам ісьціна не патрабуе нічога іншага, як яе сказаць. Часам ніхто ня можа выказаць нешта лепш і дакладней, чым самі прататыпы, тыя, хто перажыў рэчы, якія не пад сілу ніякай фантазіі.
Мой аўтарскі ўклад у гэты тэкст заключаецца толькі ў пошуку і прачытаньні многіх сотняў сьведчаньняў ахвяр палітычнага тэрору ў Беларусі, каб выбраць 16 галасоў, якія склалі б мазаіку, здольную даць адзіную цэласную карціну таго, што адбылося ў Беларусі.
Гэты тэкст зьяўляецца калектыўным прызнаньнем народу, які быў зьбіты, згвалтаваны, зьняважаны. Гэта галасы ахвяр гвалту, людзей, якія жудасна пацярпелі. У тэксьце — публічныя інтэрвію і лісты палітвязьняў, а таксама беларусаў, якія пацярпелі ад рэпрэсій. Усе імёны і прозьвішчы сапраўдныя. Іх гісторыі складаюць дакумэнт. Дакумэнт гістарычнага значэньня».
Фільм заснаваны на апублікаваных інтэрвію, сьведчаньнях і лістах беларусаў, якія сталі ахвярамі рэпрэсій у Беларусі. Сярод іх — Марыя Калесьнікава, Мікалай Статкевіч, Ігар Лосік, Анатоль Кудласевіч, Андрэй Праскурын, Жанна Лагуціна, Марына Золатава, Сьцяпан Латыпаў, Вітольд Ашурак.
Грамадзкі і экалягічны актывіст Вітольд Ашурак трагічна загінуў у нечалавечых умовах утрыманьня ў карцары калёніі № 17 у Шклове. У фільме ягоным голасам стаў вядомы расейскі актор Канстанцін Райкін. Ён цытуе фрагмэнт ліста Вітольда Ашурка маці.
Па выніках леташніх пратэстаў суд пакараў актывіста з Горадзеншчыны 5 гадамі калёніі. Аднак празь некалькі месяцаў той пры загадкавых абставінах памёр у зьняволеньні. Цела Вітольда Ашурка перадалі родным з забінтаванай галавой. Афіцыйная прычына сьмерці — спыненьне сэрца. Блізкія і паплечнікі перакананыя, што актывіста забілі.
- Рэжысэр фільму «Галасы новай Беларусі» — Аксана Мысіна.
- Аўтар сцэнару — драматург Андрэй Курэйчык.
- Кампазытар — Сяргей Кучменка.
Фрагмэнт фільму, прысьвечаны Марыі Калесьнікавай, выканала актрыса і журналістка Ганна Сіроціна.
