Пэнсіянэрку арыштавалі, бо доўга не адчыняла дзьверы сілавікам
59-гадовай пэнсіянэрцы Ніне Маслоўскай далі 8 дзён арышту, бо не адразу адчыніла супрацоўнікам ДФР.
1 сьнежня да жанчыны прыйшлі дадому супрацоўнікі ДФР зь ператрусам, пасьля яе забралі на допыт. Затым Маслоўскую пакінулі на ноч у РАУС да суду. На судзе высьветлілася, што яе судзяць за непадпарадкаваньне міліцыі.
Справу разглядала судзьдзя суду Першамайскага раёну Анастасія Кулік.
Маслоўская віну не прызнала. Яна патлумачыла на судзе, што званок у дзьверы ў сем ранку яе абудзіў. На тое, каб адзецца, ёй спатрэбілася каля пяці хвілін, тады яна і адчыніла дзьверы. Паводле словаў міліцыянтаў-сьведкаў, жанчына не адчыняла 20 хвілін.
Пэнсіянэрка на судзе дадала, што ў яе цыстыт і высокі ціск, папрасіла перадаць таблеткі, але ў сваякоў іх не прынялі.
Абмежавалі доступ да сайту «Наш дом»
У Беларусі абмежавалі доступ да сайту арганізацыі «Міжнародны цэнтар грамадзкіх ініцыятываў „Наш дом“». Адпаведную пастанову вынес генпракурор Швед, перадае «Белсат».
Затрымалі сябра партыі «Зялёных»
Правялі ператрус і затрымалі сябра Цэнтральнай Рады беларускай партыі «Зялёных» Дзяніса Тушынскага. Пра гэта ў Facebook паведаміў Дзьмітры Кучук.
Затрымалі журналіста зь Бярозаўкі
У Бярозаўцы Лідзкага раёну затрымалі журналіста Юрася Дзешука, паведамляе БАЖ. Ён праходзіць падазраваным па крымінальнай справе аб хуліганстве. Яе завялі пасьля абвяшчэньня прысуду Вітольду, калі ў залі нехта пачаў крычаць «Ганьба», «Верым, можам, пераможам». Юрася сёлета затрымлівалі некалькі разоў на содні, праводзілі ператрусы і адпускалі.
Блізкія Дзешука паведамілі, што яго адпусьцілі.
Гарадзенцу з інваліднасьцю далі 1,5 года калёніі, бо сыгналіў
У судзе Кастрычніцкага раёну Горадні абвясьцілі прысуд Дзьмітрыю Горбачу. Мужчыну прызналі вінаватым у арганізацыі і падрыхтоўцы дзеяньняў, якія груба парушаюць грамадзкі парадак (ч.1 арт. 342 Крымінальнага кодэксу) і асудзілі на 1,5 года калёніі, паведамляе «Гарадзенская праваабарона».
Справу разглядаў судзьдзя Віталь Лабоцкі. Падставай для крымінальнай справы сталі падзеі 10 жніўня 2020 году. У той дзень Дзьмітры Горбач езьдзіў каля абласной філярмоніі і сыгналіў.
Дзьмітры Горбач мае інваліднасьць трэцяй групы.
Затрымалі жыхара Полацку
Жыхара Полацку затрымалі па падазрэньні ў стварэньні экстрэмісцкага фармаваньня і распальваньні варожасьці. На 52-гадовага мужчыну завялі крымінальную справу па трох артыкулах. У прэс-рэлізе міліцыі яго называюць стваральнікам тэлеграм-каналу, у якім ён нібыта разьмяшчаў інструкцыі па арганізацыі масавых беспарадкаў.
Паводле МУС, затрыманы жыхар Полацку кіраваў тэлеграм-каналам, знаходзячыся ў Беларусі і ў Польшчы.
