Лінкі ўнівэрсальнага доступу

Прэзыдэнт Паўднёвай Афрыкі заклікаў скасаваць забароны на пералёты, якія ўвялі праз новы штам каранавірусу


Сірыль Рамафоса
Сірыль Рамафоса

Раней шэраг краін ЭЗ, Вялікая Брытанія і ЗША скасавалі ўсе пералёты з ПАР, бо там быў выяўлены новы штам каранавірусу.

Прэзыдэнт Паўднёва-Афрыканскай рэспублікі Сірыль Рамафоса папрасіў іншыя краіны скасаваць забарону на пералёты з ПАР праз узьнікненьне штаму каранавірусу — «Омікрон». Ён асудзіў такое рашэньне, сказаў, што «глыбока расчараваны», і заклікаў як мага хутчэй аднавіць пералёты, бо іх адсутнасьць нясе вялікую эканамічную шкоду дзяржавам на поўдні Афрыкі, у тым ліку ягонай, паведамляе ВВС.

Раней Вялікая Брытанія, Злучаныя Штаты і Эўразьвяз увялі забароны на пералёты з Паўднёвай Афрыкі, бо адтуль пачаў пашырацца новы штам хваробы.

У сваёй прамове ў нядзелю Рамафоса сказаў, што забароны на паездкі «ня маюць навуковага базісу» і што Паўднёвая Афрыка стала ахвярай несправядлівай дыскрымінацыі. Ён таксама перакананы, што забароны ня будуць эфэктыўнымі для прадухіленьня распаўсюду штаму.

«Адзінае, што зробіць забарона на паездкі, — гэта яшчэ больш пашкодзіць эканоміцы пацярпелых краін і падарве іх здольнасьць рэагаваць на пандэмію і аднаўляцца пасьля яе», — сказаў прэзыдэнт.

У самой Паўднёвай Афрыцы няма дэфіцыту вакцын, і Рамафоса заклікаў больш людзей атрымаць прышчэпку, сказаўшы, што гэта застаецца «найлепшым спосабам барацьбы зь вірусам».

Штам «омікрон» выявілі на поўдні Афрыкі ў лістападзе. Сусьветная арганізацыя здароўя прызнала В.1.1.529 пагрозай, бо ён можа перадавацца хутчэй за іншыя штамы, заражаць тых, хто ўжо перахварэў, і аслабляць дзеяньне вакцын.

Выпадкі заражэньня штамам «Омікрон» пацьверджаныя ў Бэльгіі, Вялікай Брытаніі, Ганконгу, Нямеччыне, Італіі і Чэхіі. 28 лістапада Ізраіль стаў першай краінай сьвету, якая закрыла межы, каб не дапусьціць распаўсюду хваробы.

У САЗ падкрэсьлілі, што пакуль пра новы штам мала дадзеных, каб гаварыць з упэўненасьцю, што ён распаўсюджваецца хутчэй за існыя варыяцыі каранавірусу, што ён «абыходзіць» дзеяньне вакцын або што прыводзіць да цяжэйшага цячэньня хваробы.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG