Затрыманага 11 лістапада Анатоля Шаўковіча, выказваньне якога ў «пакаяльным» відэа МУС пра любоў да белага і чырвонага колераў (у прыватнасьці, да чырвоных памідораў зь белай сьмятанай) стала новым мэмам, асудзілі на чарговыя 15 сутак.
Навіну аб працягу арышту Анатоля Шаўковіча апублікаваў у Facebook Аляксандар Знак, бацька палітзьняволенага юрыста Максіма Знака.
«Майго сябра Анатоля арыштавалі ў дзень народзінаў, калі яму споўнілася 65 гадоў. Сёньня дадалі яшчэ 15 сутак... Твар у яго чырвоны, а валасы сівыя, то бок белыя. І ён чакае вашых лістоў на Акрэсьціна».
Паводле якіх артыкулаў судзілі інжынэра, на гэты момант дакладна невядома.
Пасьля першага затрыманьня мужчыны прэс-служба МУС паведамляла, што ён нібыта «арганізаваў у падвале дома вытворчасьць пратэставай сымболікі; вырабленыя сьцягі мужчына закідваў на дрэвы».
