Лінкі ўнівэрсальнага доступу

Дэлегацыя САЗ прыбыла ў Беларусь для назіраньня за сытуацыяй зь мігрантамі


Сусьветная арганізацыя здароўя

Дэлегацыя Сусьветнай арганізацыі здароўя ўжо паразмаўляла зь мігрантамі на беларуска-польскай мяжы.

Лягер для мігрантаў у лягістычным цэнтры ўжо наведаў дырэктар па супрацьдзеяньні надзвычайным сытуацыям Эўрапейскага рэгіянальнага бюро САЗ Джэральд Рокеншаўб, паведаміла прэс-служба Міністэрства аховы здароўя Беларусі.

«Уцекачы скардзіліся на здароўе, у некаторых ёсьць хранічныя захворваньні. Беларускія ўлады дапамагаюць у вырашэньні гэтых праблем. Мы як прадстаўнікі САЗ уступаем у дыялёг і даведаемся, што неабходна зрабіць, чым мы можам дапамагчы са свайго боку», — кажа Джэральд Рокеншаўб.

Рокеншаўб таксама падкрэсьліў, што выкарыстаньне сьлезацечнага газу можа выклікаць праблемы са здароўем.

«Мы глядзім на тое, як дапамагчы людзям, якія зазналі яго ўзьдзеяньне», — сказаў ён.

Большасьць мігрантаў сказалі, што не жадаюць вяртацца дадому.

«Мы мабілізуем нашу дапамогу ў пляне аказаньня падтрымкі мэдыкамэнтамі, міжнароднымі пакетамі з мэддапамогай і прадметамі гігіены. Працуем з партнэрамі: ААН, UNICEF, Чырвоным Крыжам і іншымі», — адзначыў ён.

У панядзелак, 22 лістапада, у Беларусь прыбудзе дырэктар Эўрапейскага рэгіянальнага бюро САЗ Ґанс Клюґе.

Беларускія сілавікі раней завялі крымінальную справу супраць службовых асобаў Польшчы па факце нападу на мігрантаў са сьлезацечным газам і вадамётамі. Польшча, у сваю чаргу вінаваціць рэжым Лукашэнкі ў выкарыстаньні мігрантаў як палітычнай зброі: памежнікі Польшчы, Літвы і Латвіі прадставілі дзясяткі фота- і відэадоказаў сілавога выштурхоўваньня беларускіх сілавікоў за калючы дрот на тэрыторыю Эўразьвязу.

Акрамя таго, шэраг мігрантаў пасьля знаходжаньня ў Беларусі скардзіліся на польскіх памежнікаў, якія не ўпускалі іх у сваю краіну, а таксама заяўлялі пра тое, што беларускія сілавікі жорстка зьбівалі іх, пазбаўлялі неабходных рэчаў, рабавалі і пад пагрозай зброі прымушалі лезьці цераз дрот на тэрыторыі сумежных дзяржаў, парушаючы заканадаўства.

З часу пачатку мігранцкага крызісу ў беларускай памежнай паласе з краінамі Эўразьвязу загінула больш за дзясятак чалавек.

Мігранцкі крызіс — 2021. Асноўнае

  • У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Найперш вялікія патокі мігрантаў накіраваліся ў Літву, па стане на верасень — звыш 4,2 тысячы чалавек з краінаў Азіі і Афрыкі. Затым напружаньне на сваіх межах адчулі Латвія і Польшча.
  • Рэагуючы на крызіс, Літва і Польшча пачалі будаваць сьцяну на мяжы зь Беларусьсю.
  • Урады Літвы, а затым Латвіі і Польшчы, улетку 2021-га зрабілі істотна больш строгім заканадаўства аб нелегальным перасячэньні дзяржаўнай мяжы, а таксама выслалі ў памежныя зь Беларусьсю раёны падмацаваньне з вайсковых злучэньняў. Лукашэнку абвінавацілі ў спрыяньні нелегальнай міграцыі ў краіны Эўразьвязу.
  • У Літве ў лягерах для ўцекачоў мігранты неаднаразова ладзілі бунты і намагаліся зьбегчы.
  • Улады Польшчы зь верасьня распачалі затрыманьні і дэпартацыі людзей, якія дапамагаюць мігрантам нелегальна перасякаць мяжу. Сярод іх як грамадзяне Польшчы, так і грамадзяне Беларусі, краінаў Азіі, у тым ліку некаторыя асобы, што маюць від на жыхарства ў краінах Эўразьвязу.
  • Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
  • Прэс-сакратар каардынатара спэцслужбаў Польшчы Станіслаў Жарын 27 верасьня заявіў, што 20% затрыманых мігрантаў маюць сувязі з Расеяй, пра што сьведчаць знойдзеныя доказы. Міністар унутраных спраў і адміністрацыі Мар’юш Каміньскі сказаў, што беларускія памежнікі даюць мігрантам псыхатропныя сродкі, у тым ліку дзецям.
  • 30 верасьня ПАРЭ катэгарычна асудзіла практыку вяртаньня мігрантаў «у трэцюю краіну, дзе ім ня можа быць гарантавана міжнародная абарона», і нагадала Латвіі, Літве і Польшчы пра забарону на калектыўную высылку іншаземцаў.
  • 8 кастрычніка Варшава заявіла, што трактуе паводзіны беларускага боку як «агрэсіўныя дзеяньні супраць Польшчы». Зьявіўся шэраг відэадоказаў, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
  • На межах Беларусі з Польшчай і Літвой ад пачатку міграцыйнага крызісу загінулі сама меней 9 чалавек.
  • 8 лістапада раніцай на мяжы зь беларускага боку заўважылі буйную калёну зь некалькіх сотняў мігрантаў, якія рушылі ў суправаджэньні ўзброеных сілавікоў да калючага дроту на мяжы з Польшчай, намагаючыся перасекчы мяжу. Паводле розных ацэнак, іх колькасьць была ад 2 да 4 тысяч чалавек. Многія атрымалі візы ў беларускім дыпляматычным прадстаўніцтве ў Анкары, турэцкія авіякампаніі ўдзельнічаюць у перакіданьні мігрантаў у Беларусь.
  • У наступныя дні мігранты пры спрыяньні беларускіх сілавікоў сталі лягерам на памежнай паласе. Курд з Іраку Рэбаз Наджм Хама Саід сказаў Свабодзе, што беларуская міліцыя дапамагае высякаць дрэвы для вогнішчаў на беларускай жа тэрыторыі. Некаторым групам удалося прарвацца на польскую тэрыторыю, але вайскоўцы затрымалі ўсіх парушальнікаў.
  • 10 лістапада эўрадэпутат Радаслаў Сікорскі заявіў, што крызіс на мяжы ініцыяваны пры падтрымцы Масквы, а Лукашэнку трэба прызнаць тэрарыстам і выдаць Міжнароднаму трыбуналу. Шэраг іншых эўрапейскіх палітыкаў таксама выказалі ўпэўненасьць, што Пуцін з дапамогай Лукашэнкі расхіствае Эўропу, пачуліся заклікі да ЭЗ дзейнічаць актыўна, а не чакаць.
  • 11 лістапада ў паветранай прасторы Беларусі пачалі патруляваць межы расейскія бамбавікі Ту-22М3. Яны належаць паветрана-касьмічным сілам Расеі.
  • 11 лістапада Фэдэральная паліцыя Нямеччыны заявіла, што толькі за першыя дні лістапада ў краіну трапілі больш за тысячу мігрантаў, якія выкарысталі Беларусь як краіну транзыту.
  • Са жніўня польскія памежнікі спынілі больш за 33 тысячы спробаў нелегальнага перасячэньня мяжы з боку Беларусі, летась іх было 88.
  • 15 лістапада больш за 3 тысячы мігрантаў сабраліся на беларускім памежным пераходзе «Брузгі» перад лініяй польскай мяжы, умацаванай часовымі загародамі і шарэнгай польскіх вайскоўцаў.
  • Па словах прэс-сакратара Лукашэнкі Натальлі Эйсмант, у Беларусі агулам каля 7 тысяч мігрантаў, якія спадзяюцца трапіць у Нямеччыну.
  • 22 лістапада ў Бэрліне адмовіліся прымаць каля 2 тысяч чалавк з Блізкага Ўсходу, якія прыбылі ў Беларусь пасьля арганізацыі рэжымам Лукашэнкі мігранцкага крызісу.
  • 25 лістапада мігранты правялі акцыю пратэсту на памежжы, заяўляючы, што ня хочуць вяртацца назад у свае краіны.
  • На больш чым дзесяці эвакуацыйных рэйсах у Ірак і Сырыю ў лістападзе-сьнежні Беларусь пакінулі каля 4,5 тысяч мігрантаў.
  • На пачатку 2022 году сталі вядомыя тэрміны пабудовы агароджаў на мяжы зь Беларусьсю. Польшча адзначыла, што агароджу дабудуюць да канца чэрвеня, а Літва, што да восені.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG