Кампартыя Кітаю ўхваліла рэзалюцыю аб вядучай ролі Сі Цзіньпіна

Тым самым партыя падрыхтавала шлях для пераабраньня Сі Цзіньпіна на трэці тэрмін, адзначае DW.

ЦК Кампартыі Кітаю ўзьвёў старшыню КНР Сі Цзіньпіна на адну прыступку з двума найбуйнейшымі камуністычнымі лідэрамі краіны — Мао Цзэдунам і Дэн Сяопінам. У чацьвер, 11 лістапада, 370 чальцоў ЦК КПК па выніках чатырохдзённага пасяджэньня прынялі «гістарычную рэзалюцыю», у якой замацоўваецца «вырашальны ўнёсак» Сі Цзіньпіна ў працэс «вялікага адраджэньня кітайскай нацыі» і неабходнасьць падтрымаць яго як «ядро партыі».

ЦК КПК заклікаў кітайцаў згуртавацца вакол Сі Цзіньпіна

У доўгім дакумэнце ўтрымліваецца заклік да адстойваньня «правільнага погляду на гісторыю партыі», паведаміла агенцтва Сіньхуа. Рэзалюцыя заклікае «ўсю партыю, усё войска і людзей усіх этнічных групаў» згуртавацца вакол Сі Цзіньпіна, ідэалёгія якога зьяўляецца «ўвасабленьнем кітайскай культуры і душы».

Паказаныя дзяржаўным тэлеканалам CCTV кадры сьведчаць аб тым, што чальцы ЦК КПК галасавалі за рэзалюцыю ўзьняцьцем рук у прысутнасьці Сі Цзіньпіна. «З улікам партыйных патрабаваньняў, якія датычацца дысцыпліны і ляяльнасьці, наступствы для любога чальца партыі, які прагаласаваў бы супраць рэзалюцыі, былі б катастрафічныя», — адзначыў у інтэрвію Reuters дацэнт паліталёгіі Пэкінскага ўнівэрсытэту Ян Чаохуэй.

У сваю чаргу, экспэрт у кітайскай палітыцы Цэнтру міжнародных і стратэгічных дасьледаваньняў у Вашынгтоне Джуд Бланшэт заявіла Reuters аб «падобных да культу асобы характарыстыках» прынятага ЦК КПК дакумэнта.

ГЛЯДЗІЦЕ ТАКСАМА:

Пэкін адрэагаваў на пагрозы Лукашэнкі абмежаваць транзыт тавараў у Кітай

Падобныя дакумэнты прымаліся раней толькі двойчы

Гэта толькі трэці дакумэнт такога кшталту за 100-гадовую гісторыю Кампартыі Кітаю пасьля аналягічных рэзалюцыяў, прынятых у 1945 годзе ў дачыненьні да Мао Цзэдуна і ў 1981 годзе ў дачыненьні да Дэн Сяопіна.

Як чакаецца, рэзалюцыя ўмацуе ўладу кітайскага лідэра і адкрые яму пэрспэктыву трэцяга тэрміну на чале кітайскай дзяржавы ці нават пажыцьцёвага кіраваньня, адзначае агенцтва dpa са спасылкай на апытаных экспэртаў.

ГЛЯДЗІЦЕ ТАКСАМА:

Чым падобныя і чым адрозныя Аляксандар Лукашэнка і Сі Цзіньпін

У 2018 годзе Камуністычная партыя Кітаю скасавала абмежаваньне на займаньне вышэйшых дзяржаўных і партыйных пасадаў і зрабіла магчымым кіраваць дзяржавай і партыяй на працягу больш як двух тэрмінаў.

Як чакаецца, паўнамоцтвы Сі Цзіньпіна будуць падоўжаныя ў 2022 годзе.