Лінкі ўнівэрсальнага доступу

Мігранцкі крызіс на мяжы: што адбываецца 8 лістапада. ОНЛАЙН

абноўлена

8 лістапада тысячы мігрантаў прыйшлі да калючага дроту на мяжы Беларусі з Польшчай. Урад Польшчы заявіў, што прыводзіць свае войскі ў поўную баявую гатоўнасьць. Ёсьць інфармацыя пра спробы прарыву.

  • Раніцай 8 лістапада ў сацыяльных сетках зьявіліся відэа буйной групы мігрантаў, якая рухалася ў пункт пропуску «Брузгі» на мяжы з Польшчай. Але пазьней група, якую суправаджалі грузавікі зь зялёнымі нумарамі беларускай памежнай службы і вайскоўцы з аўтаматамі і сабакамі, сышла ў лес.
  • Каля тысячы мігрантаў ушчыльную наблізіліся да польскай мяжы, з-за дроту за імі сачылі ўзмоцненыя сілы польскай памежнай варты і Мінабароны.
  • А 15-й гадзіне стала вядома пра першую спробу прарыву мяжы, якую спынілі польскія вайскоўцы. Мігранты штурмавалі польскую агароджу з дапамогай сякераў, бярвёнаў, рыдлёвак і кусачак.
  • Польскі бок заявіў, што штурм іх мяжы адбываецца «ў прысутнасьці і пад кантролем беларускіх службаў».
  • Увечары частка мігрантаў усё ж дабралася да польскага памежнага пераходу «Кузьніца», але там іх спынілі польскія памежнікі.
  • Паводле Памежнага камітэту Беларусі, каля мяжы цяпер знаходзяцца больш за 2 тысячы мігрантаў. Прэсавы сакратар польскага ўраду Пётар Мюлер заявіў, што каля мяжы знаходзяцца 3-4 тысячы асобаў.
  • Увечары зьявілася відэа са стрэламі на мяжы. Памежны камітэт Беларусі заявіў, што стралялі з польскага боку.
17:11 8.11.2021

Дарадца Ціханоўскай прапанаваў уладам Польшчы і Літвы прыпыніць перавозку грузаў празь беларускую мяжу

Дарадца Сьвятланы Ціханоўскай Франак Вячорка прапанаваў уладам Польшчы і Літвы зрабіць захады ў адказ на эскаляцыю крызісу на мяжы:

Тэрмінова спыніць грузавыя перавозкі (аўтамабілі і цягнікі) да стабілізацыі сытуацыі на мяжы з ЭЗ.

Прыняць санкцыі ў дачыненьні да банкаў рэжыму і праваахоўных органаў, адказных за незаконны ўвоз мігрантаў.

16:56 8.11.2021

Беларуская дзяржаўная агенцыя «БелТА» апублікавала фота і відэа зь мяжы

Дзяржпагранкамітэт Беларусі сцвярджае, што «ўсе гэтыя людзі не прадстаўляюць пагрозу бяспецы і не паводзяць сябе агрэсіўна».

Фотакарэспандэнты і журналісты БелТА маюць магчымасьць працаваць на мяжы. На фота бачна, што мігранты сякуць дрэвы, пакуль яны застаюцца на тэрыторыі Беларусі.

16:34 8.11.2021

Польшча: штурм польскай мяжы адбываецца «ў прысутнасьці і пад кантролем беларускіх службаў»

Міністэрства абароны Польшчы публікуе ў Твітэры фота беларускіх сілавікоў і сьцьвярджае, што штурм польскай мяжы адбываецца «ў прысутнасьці і пад кантролем беларускіх службаў»

16:22 8.11.2021

Чарговая спроба прарыву мяжы

Міністэрства ўнутраных справаў і адміністрацыі Польшчы апублікавала відэа чарговай спробы прарыву беларуска-польскай мяжы.

16:17 8.11.2021

Як мігранты спрабуюць пашкодзіць памежную агароджу бярвёнамі

Зьвявілся відэа, як мігранты спрабавалі пашкодзіць памежную агароджу бярвёнамі.

15:51 8.11.2021

Ціханоўская: «Рэжым Лукашэнкі зладзіў беспрэцэдэнтную міжнародную правакацыю»

Палітык пракамэнтавала падзеі каля пераходу «Брузгі — Кузьніца» на беларуска-польскай мяжы.

«Сёньня рэжым зладзіў беспрэцэдэнтную міжнародную правакацыю: сотні людзей, якія даверылі яму свае лёсы, рэжым выкінуў на мяжу з Польшчай у ачапленьні ўзброеных сілавікоў. Мы бачым гэтыя жахлівыя кадры і памятаем, што на мяжы ўжо гінулі мігранты. Нельга дапусьціць, каб чарговая правакацыя прывяла да эскаляцыі гвалту і новых ахвяр».

Таксама, на думку Ціханоўскай, зараз неабходны рашучы адказ з боку Эўразьвязу, а ААН павінна разгледзець магчымасьць адправіць гуманітарную місію ў Беларусь.

15:49 8.11.2021

Дональд Туск прапанаваў рэалізацыю 4-га артыкула NATO. Што гэта значыць

Былы прэзыдэнт Эўрапейскай Рады і колішні польскі прэм’ер Дональд Туск заклікаў урад краіны распрацаваць плян па прадухіленьні мігранцкага крызісу на мяжы зь Беларусьсю.

«Магчыма, ужо час падумаць, ці не прыйшоў час пачаць рэалізацыю 4-га артыкула NATO. Калі нашая мяжа будзе пад пагрозай фізычнага ціску пры ўдзеле беларусаў, я маю на ўвазе беларускія службы, то, думаю, гэта нагода пачаць кансультацыі ў рамках Паўночнаатлянтычнага альянсу. Бо гэта ўжо датычыць бясьпекі ўсёй усходняй мяжы ЭЗ і NАТО, такіх краін, як Польшча і Літва», — сказаў Туск.

Згаданы Тускам артыкул прадугледжвае правядзеньне надзвычайных кансультацый у NATO, калі адна з краін альянсу лічыць, што яе незалежнасьць, тэрытарыяльная цэласнасьць або бясьпека апынуліся пад пагрозай.

15:31 8.11.2021

Мігранты спрабавалі прарваць беларуска-польскую мяжу. ВІДЭА

Міністэрства ўнутраных справаў і адміністрацыі Польшчы апублікавала ў сваім Твітэры відэа, на якім бачна, як група мігрантаў спрабуе прарваць агароджу на беларуска-польскай мяжы.

«Польскія службы прадухілілі спробу мігрантаў прарвацца на польскі бок на поўдзень ад памежнага пераходу ў Кузьніцы. Сытуацыя знаходзіцца пад кантролем», — гаворыцца ў твіце міністэрства.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

XS
SM
MD
LG