Лінкі ўнівэрсальнага доступу

Прэзыдэнт ПАРЭ асудзіў рэпрэсіі супраць грамадзянскай супольнасьці і праваабаронцаў у Беларусі


Прэзыдэнт Парлямэнцкай асамблеі Рады Эўропы Рык Дамс, архіўнае фота

Прэзыдэнт Парлямэнцкай асамблеі Рады Эўропы Рык Дамс «рашуча асудзіў» рэпрэсіі супраць грамадзянскай супольнасьці і праваабаронцаў у Беларусі.

Ён заклікаў беларускія ўлады «ў поўнай меры паважаць правы на свабоду асацыяцый, сходаў і выказваньня меркаваньняў, а таксама ўсе іншыя правы чалавека, гарантаваныя Міжнародным пактам аб грамадзянскіх і палітычных правах, удзельнікам якога зьяўляецца Беларусь», паведамляе прэс-служба ПАРЭ.

«У апошнія тыдні сытуацыя з захаваньнем асноўных правоў чалавека ў Беларусі стала ўсё больш непакоіць мяне, а таксама, у шырэйшым кантэксьце, Парлямэнцкую асамблею Рады Эўропы, — адзначыў ён. — Працяглыя і зусім неабгрунтаваныя турэмныя тэрміны для двух лідэраў апазыцыі — Марыі Калесьнікавай, ляўрэата прэміі ПАРЭ імя Вацлава Гавэла ў гэтым годзе, і Максіма Знака — шакавалі большасьць людзей у Эўропе».

Дамс падкрэсьліў, што судовыя прысуды Калесьнікавай і Знаку — «не адзіны прыклад палітычнага перасьледу ў Беларусі»:

«Прынамсі 30 праваабаронцаў, некаторыя зь якіх супрацоўнічалі з Радай Эўропы, застаюцца ў папярэднім зьняволеньні, некаторыя зазнаюць крымінальны перасьлед або іншыя формы перасьледу. Некаторыя знаходзяцца ў выгнаньні», — адзначыў Рык Дамс.

Па словах Дамса, асабліва ён занепакоены тым, што пад вартай застаюцца 7 сябраў праваабарончай арганізацыі «Вясна», якая займаецца дакумэнтаваньнем парушэньняў правоў чалавека ў Беларусі пасьля прэзыдэнцкіх выбараў 2020 году. Сярод іх — тры лідэры «Вясны», у тым ліку Алесь Бяляцкі, яшчэ адзін ляўрэат прэміі імя Вацлава Гавэла.

Дамс таксама зазначыў, што зь ліпеня ў Беларусі ліквідуюцца няўрадавыя арганізацыі, у тым ліку тыя, якія працавалі ў сфэры абароны правоў чалавека, уключаючы Беларускі Хэльсынскі камітэт, «Прававую ініцыятыву» і «Зьвяно».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG