Лінкі ўнівэрсальнага доступу

ААН: Беларусь і Польшча ігнаруюць просьбы мігрантаў аб прытулку


Мігранты на беларуска-польскай мяжы, архіўнае фота
Мігранты на беларуска-польскай мяжы, архіўнае фота

Управа Вярхоўнага камісара ААН у справах уцекачоў заявіла, што група афганскіх мігрантаў, якая знаходзіцца пры мяжы, хацела б папрасіць прытулку ці ў Беларусі, ці ў Польшчы, аднак улады абедзьвюх краін не даюць ім гэтага зрабіць.

У заяве, апублікаванай 22 кастрычніка, Управа ААН згадала пра сьмерці мігрантаў на мяжы і заклікала да неадкладных захадаў, каб уратаваць жыцьці і не выракаць людзей на пакуты.

«Калі асноўныя правы чалавека не абароненыя, на карту пастаўленыя жыцьці. Недапушчальна, каб людзі паміралі, каб іхныя жыцьці віселі на валаску. Яны закладнікі тупіковай палітычнай сытуацыі, якую неабходна разьвязаць зараз», — заявіў Паскаль Маро, рэгіянальны дырэктар Управы ў Эўропе.

Паводле ўправы, на мяжы ад жніўня да гэтага часу знаходзіцца група з 32 мігрантаў. На гэтым тыдні 16 зь іх спрабавалі трапіць у Польшчу, але іх затрымалі і вярнулі ў Беларусь. Управа заявіла, што польскія ўлады не дазваляюць прадстаўнікам ААН сустрэцца зь мігрантамі. Жыцьцёва важную дапамогу ўцекачам прадстаўнікі ААН змаглі перадаць толькі зь беларускага боку.

Управа ААН сьцьвярджае, што афганцы выказалі жаданьне атрымаць прытулак альбо ў Беларусі, альбо ў Польшчы. Але іхную просьбу праігнаравалі абодва бакі, парушыўшы міжнародныя правы чалавека і ўцекачоў у прыватнасьці.

«Людзі павінны мець магчымасьць ажыцьцяўляць свае правы там, дзе яны знаходзяцца, ці то ў Беларусі, Польшчы ці іншых дзяржавах ЭЗ, дзе яны могуць знаходзіцца. Гэта павінна ўключаць у сябе магчымасьць шукаць прытулку, доступ да юрыдычнай дапамогі, інфармацыі і адпаведнага жытла», — гаворыцца ў заяве Управы Вярхоўнага камісара ААН у справах уцекачоў.

22 кастрычніка польскія памежнікі зафіксавалі 457 спробаў незаконнага пранікненьня на тэрыторыю Польшчы, 6 мігрантаў затрымалі, астатніх разьвярнулі. Трох чалавек затрымалі за дапамаганьне мігрантам. У польскіх міграцыйных цэнтрах цяпер знаходзяцца 1700 чалавек.

У Літве спынілі 76 спробаў парушэньня мяжы.

Беларускі памежны камітэт паведаміў, што на літоўскай мяжы заблыталіся ў калючым дроце і здохлі лось і казуля.

Міграцыйны крызіс — 2021. Асноўнае

  • У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Найперш вялікія патокі мігрантаў накіраваліся ў Літву, па стане на верасень — звыш 4,2 тысячы чалавек з краінаў Азіі і Афрыкі. Затым напружаньне на сваіх межах адчулі Латвія і Польшча.
  • Рэагуючы на крызіс, Літва і Польшча пачалі будаваць сьцяну на мяжы зь Беларусьсю.
  • Урады Літвы, а затым Латвіі і Польшчы, улетку 2021-га зрабілі істотна больш строгім заканадаўства аб нелегальным перасячэньні дзяржаўнай мяжы, а таксама выслалі ў памежныя зь Беларусьсю раёны падмацаваньне з вайсковых злучэньняў. Лукашэнку абвінавацілі ў спрыяньні нелегальнай міграцыі ў краіны Эўразьвязу.
  • У Літве ў лягерах для ўцекачоў мігранты неаднаразова ладзілі бунты і намагаліся зьбегчы.
  • Улады Польшчы зь верасьня распачалі затрыманьні і дэпартацыі людзей, якія дапамагаюць мігрантам нелегальна перасякаць мяжу. Сярод іх як грамадзяне Польшчы, так і грамадзяне Беларусі, краінаў Азіі, у тым ліку некаторыя асобы, што маюць від на жыхарства ў краінах Эўразьвязу.
  • Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
  • Прэс-сакратар каардынатара спэцслужбаў Польшчы Станіслаў Жарын 27 верасьня заявіў, што 20% затрыманых мігрантаў маюць сувязі з Расеяй, пра што сьведчаць знойдзеныя доказы. Міністар унутраных спраў і адміністрацыі Мар’юш Каміньскі сказаў, што беларускія памежнікі даюць мігрантам псыхатропныя сродкі, у тым ліку дзецям.
  • 30 верасьня ПАРЭ катэгарычна асудзіла практыку вяртаньня мігрантаў «у трэцюю краіну, дзе ім ня можа быць гарантавана міжнародная абарона», і нагадала Латвіі, Літве і Польшчы пра забарону на калектыўную высылку іншаземцаў.
  • 8 кастрычніка Варшава заявіла, што трактуе паводзіны беларускага боку як «агрэсіўныя дзеяньні супраць Польшчы». Зьявіўся шэраг відэадоказаў, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
  • На межах Беларусі з Польшчай і Літвой ад пачатку міграцыйнага крызісу загінулі сама меней 9 чалавек.
  • 8 лістапада раніцай на мяжы зь беларускага боку заўважылі буйную калёну зь некалькіх сотняў мігрантаў, якія рушылі ў суправаджэньні ўзброеных сілавікоў да калючага дроту на мяжы з Польшчай, намагаючыся перасекчы мяжу. Паводле розных ацэнак, іх колькасьць была ад 2 да 4 тысяч чалавек. Многія атрымалі візы ў беларускім дыпляматычным прадстаўніцтве ў Анкары, турэцкія авіякампаніі ўдзельнічаюць у перакіданьні мігрантаў у Беларусь.
  • У наступныя дні мігранты пры спрыяньні беларускіх сілавікоў сталі лягерам на памежнай паласе. Курд з Іраку Рэбаз Наджм Хама Саід сказаў Свабодзе, што беларуская міліцыя дапамагае высякаць дрэвы для вогнішчаў на беларускай жа тэрыторыі. Некаторым групам удалося прарвацца на польскую тэрыторыю, але вайскоўцы затрымалі ўсіх парушальнікаў.
  • 10 лістапада эўрадэпутат Радаслаў Сікорскі заявіў, што крызіс на мяжы ініцыяваны пры падтрымцы Масквы, а Лукашэнку трэба прызнаць тэрарыстам і выдаць Міжнароднаму трыбуналу. Шэраг іншых эўрапейскіх палітыкаў таксама выказалі ўпэўненасьць, што Пуцін з дапамогай Лукашэнкі расхіствае Эўропу, пачуліся заклікі да ЭЗ дзейнічаць актыўна, а не чакаць.
  • 11 лістапада ў паветранай прасторы Беларусі пачалі патруляваць межы расейскія бамбавікі Ту-22М3. Яны належаць паветрана-касьмічным сілам Расеі.
  • 11 лістапада Фэдэральная паліцыя Нямеччыны заявіла, што толькі за першыя дні лістапада ў краіну трапілі больш за тысячу мігрантаў, якія выкарысталі Беларусь як краіну транзыту.
  • Са жніўня польскія памежнікі спынілі больш за 33 тысячы спробаў нелегальнага перасячэньня мяжы з боку Беларусі, летась іх было 88.
  • 15 лістапада больш за 3 тысячы мігрантаў сабраліся на беларускім памежным пераходзе «Брузгі» перад лініяй польскай мяжы, умацаванай часовымі загародамі і шарэнгай польскіх вайскоўцаў.
  • Па словах прэс-сакратара Лукашэнкі Натальлі Эйсмант, у Беларусі агулам каля 7 тысяч мігрантаў, якія спадзяюцца трапіць у Нямеччыну.
  • 22 лістапада ў Бэрліне адмовіліся прымаць каля 2 тысяч чалавк з Блізкага Ўсходу, якія прыбылі ў Беларусь пасьля арганізацыі рэжымам Лукашэнкі мігранцкага крызісу.
  • 25 лістапада мігранты правялі акцыю пратэсту на памежжы, заяўляючы, што ня хочуць вяртацца назад у свае краіны.
  • На больш чым дзесяці эвакуацыйных рэйсах у Ірак і Сырыю ў лістападзе-сьнежні Беларусь пакінулі каля 4,5 тысяч мігрантаў.
  • На пачатку 2022 году сталі вядомыя тэрміны пабудовы агароджаў на мяжы зь Беларусьсю. Польшча адзначыла, што агароджу дабудуюць да канца чэрвеня, а Літва, што да восені.
  • За 2023 год памежнікі суседніх зь Беларусьсю краін Эўразьвязу спынілі 42 тысячы спробаў нелегальнага пранікненьня на сваю тэрыторыю, што на траціну больш за 2022 год.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG