Трэцяга кастрычніка на тэлеканале АНТ выступіў намесьнік міністра ўнутраных спраў Генадзь Казакевіч. Ён заявіў, што ў бот тэлеграма міліцыі зьвярнуліся 2 тысячы «неабыякавых грамадзян», якія прасілі «абараніць іх ад віртуальных змагароў і давалі інфармацыю». За камэнтары затрымалі каля 200 чалавек па ўсёй краіне.
Каго затрымалі за камэнтары?
Зьвязаныя з уладай тэлеграм-каналы і дзяржаўнае тэлебачаньне паказалі ў вечаровых праграмах «прызнаньні» затрыманых людзей, зьнятыя на камэру.
Адна з затрыманых жыве ў Гомельскай вобласьці. Яна выхоўвае з мужам траіх малых дзяцей. Працуе мэдыкам, дэпутатка сельскага савету. На відэа маладая жанчына прызнаецца, што напісала «нэгатыўны камэнтар» у адной з суполак «УКантакце» і абяцае больш так не рабіць.
У Гомлі праваахоўныя органы затрымалі сына і бацьку. Сын Сяргей Кірыенка працуе ў EPAM Systems. Затрыманы і «дае прызнаньні» і ягоны бацька, Уладзімер Кірыенка.
Невядомыя схапілі пры нявызначаных абставінах і гомельскага валянтэра Ільлю Міронава. Ён паведаміў маці, што затрыманы на 72 гадзіны.
З «пакаяньня» ў праўладных тэлеграм-каналах маці даведалася, што сына затрымалі за спачуваньні сям’і забітага Андрэя Зельцара. Валянтэра ня выпусьцілі з ІЧУ — перавялі ў СІЗА.
Праваабаронцы «Вясны» пішуць, што затрыманым інкрымінуюць артыкулы 369 (абраза прадстаўніка ўлады) і 130 (распальваньне варожасьці) Крымінальнага кодэксу.
Як адбываліся затрыманьні?
Затрыманы жыхар Менску выхоўвае з жонкай траіх дзяцей. Сваякі расказалі, што 30 верасьня ў яго быў выходны. Дырэктарка папрасіла прыехаць на працу «паразмаўляць».
«Ён паехаў. Каля ўваходу сустрэў калегаў, павітаўся. Тыя спыталіся — што ён тут робіць у выходны? Адказаў, што прасілі прыехаць. Падышоў да дзьвярэй. Выскачылі людзі ў бронекамізэльках, масках, скруцілі, закінулі ў мікрааўтобус. Потым дома быў вобшук», — расказалі сваякі.
Яны дадалі, што акцыяў пратэсту мужчына не наведваў, міліцыя яго раней не затрымлівала. Сваякі ня могуць знайсьці пра яго ніякай інфармацыі.
«Ён сам патэлефанаваў з КДБ, сказаў, што ўзялі за камэнтар. Пасьля 72 гадзін з Акрэсьціна ён ня выйшаў», — зазначылі сваякі.
Адзінае, што яны даведаліся, — мужчыну інкрымінуюць частку 3 артыкула 130 КК — распальваньне варожасьці. Пакараньне — ад 5 да 12 гадоў.
29-гадовага Аляксандра, жыхара Бераставіцкага раёну, забралі «практычна з дому» — расказалі сваякі. Прайшоў вобшук, шукалі «забароненыя рэчывы». Нічога не знайшлі. Мужчыну перавялі ў Менск, на Акрэсьціна. Родныя шукаюць пра яго інфармацыю.
«Здаецца, яго ўзялі за камэнтар і абвінавачваюць у „абразе прадстаўніка ўлады“. Мы самі шукаем інфармацыю», — дадалі сваякі.
