Лінкі ўнівэрсальнага доступу

Спэцслужбы Польшчы: 20% мігрантаў, затрыманых пры пераходзе мяжы з боку Беларусі, маюць сувязі з Расеяй

абноўлена

Грузавік з польскімі памежнікамі на мяжы зь Беларусьсю

Польскія сілавікі заявілі пра сувязь кожнага пятага затрыманага на польска-беларускім памежжы з Расеяй. У 50 чалавек знайшлі доказы іх датычнасьці да ўзброеных фармаваньняў на Блізкім Усходзе.

Прэс-сакратар каардынатара спэцслужбаў Польшчы Станіслаў Жарын агучыў апошнюю інфармацыю ведамстваў, якія працуюць з затрыманымі пасьля незаконнага пераходу мяжы мігрантамі.

«20% затрыманых у Польшчы нелегальных мігрантаў мелі сувязі, часта на працягу многіх гадоў, з тэрыторыяй Расейскай Фэдэрацыі. Некаторыя зь іх хаваюць гэты факт, спрабуючы пераканаць нас у тым, што ня маюць дачыненьня да Расеі, аднак дакумэнты і іншыя доказы супярэчаць іхным запэўніваньням», — цытуе прэс-сакратара агенцтва PAP.

У Варшаве прайшла прэс-канфэрэнцыя міністра ўнутраных спраў і адміністрацыі Марыюша Каміньскага, міністра нацыянальнай абароны Польшчы Марыюша Блашчака і галоўнага камэнданта Памежнай варты краіны Томаша Прагі.

Станіслаў Жарын дадаў, што падчас допытаў мігранты робяць розныя спробы схаваць сваю сапраўдную асобу або ўтоіць інфармацыю, якая для іх нязручная.

Беларускія памежнікі даюць мігрантам псыхатропныя сродкі. Падобная сытуацыя назіраецца і ў Літве. Як сказаў Жарын, літоўскі бок перадаў палякам інфармацыю, што ў мігрантаў, якія прыйшлі зь Беларусі, знайшлі мэтадон, які далі ім на тэрыторыі Беларусі.

Марыюш Каміньскі, у сваю чаргу, дадаў, што гэты выпадак адбыўся яшчэ 22 ліпеня. Тады літоўскія памежнікі затрымалі 15 грамадзян Іраку, а таксама Расеі. Апошнія мелі чачэнскае паходжаньне, яны сказалі, што ня могуць разбудзіць сваіх дзяцей, якім 6 і 1,5 года. Як выявілася, беларускі памежнік даў ім таблеткі, «каб дзеці ня плакалі на мяжы». Гэта быў мэтадон.

Таксама чыноўнік сказаў, што захоўваецца небясьпека правакацый зь беларускага боку, аднак «польскія памежнікі маюць сталёвыя нэрвы, бо ведаюць, з кім маюць справу». Згодна зь ягонымі словамі, польскія памежнікі, якія ставяць агароджу на мяжы або правяраюць яе стан, штодня сутыкаюцца з сытуацыямі накшталт пэтардаў, што ляцяць у іх бок, або падазронымі пакетамі, падобнымі да выбухоўкі. Правакацыі зь беларускага боку здараюцца штодня.

Кіраўнік польскага МУС парэкамэндаваў ураду падоўжыць надзвычайнае становішча ў памежных зь Беларусьсю раёнах яшчэ на 60 дзён. Крызіс зь мігрантамі ня толькі працягваецца, але і разьвіваецца, колькасьць правакацый на мяжы расьце. Агульная колькасьць спробаў нелегальна перайсьці мяжу, прадухіленых польскімі службоўцамі, дасягнула 9400 выпадкаў, сказаў ён.

З 200 чалавек, якія ўтрымліваюцца ў лягеры для ўцекачоў, у 50 на носьбітах інфармацыі знайшлі «прыкметы радыкалізму». Як кажа Каміньскі, некаторыя з гэтых людзей маюць дачыненьне да ўзброеных фармаваньняў на Блізкім Усходзе.

Кіраўнік Міністэрства абароны Марыюш Блашчак паведаміў пра 2,5 тысячы жаўнераў, якіх плянуюць накіраваць на ўзмацненьне аховы мяжы найбліжэйшым часам. Патрэба ў гэтым вырасла. На гэты момант мяжу зь Беларусьсю ахоўваюць каля 4 тысяч памежнікаў, ім дапамагаюць каля 600 паліцыянтаў. Войскі тэрытарыяльнай абароны таксама напагатове.

Раней прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.

Міграцыйны крызіс-2021. Асноўнае

  • У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Найперш вялікія патокі мігрантаў накіраваліся ў Літву, па стане на верасень звыш 4,2 тысячы чалавек з краінаў Азіі і Афрыкі. Затым напружаньне на сваіх межах адчулі Латвія і Польшча.
  • Рэагуючы на крызіс, Літва і Польшча пачалі будаваць сьцяну на мяжы зь Беларусьсю.
  • Урады Літвы, а затым Латвіі і Польшчы ўлетку 2021-га зрабілі істотна больш строгім заканадаўства аб нелегальным перасячэньні дзяржаўнай мяжы, а таксама выслалі ў памежныя зь Беларусьсю раёны падмацаваньне з вайсковых злучэньняў. Лукашэнку абвінавацілі ў спрыяньні нелегальнай міграцыі ў краіны Эўразьвязу.
  • 19 верасьня прэм’ер-міністар Польшчы заявіў, што «ў Беларусі звыш 10 тысяч, а можа, і больш асобаў, перамешчаных з Блізкага Ўсходу, пераважна з Іраку, а таксама з Сырыі, каб праводзіць гібрыдную атаку».
  • 23 верасьня памежная служба Польшчы паведаміла пра сьмерць яшчэ аднаго мігранта. Раней было вядома пра сьмерць трох мігрантаў на польскім баку мяжы і аднаго на беларускім.
  • У Літве ў лягерах для ўцекачоў мігранты неаднаразова ладзілі бунты і намагаліся зьбегчы.
  • У Нямеччыне ў верасьні выявілі некалькіх мігрантаў пераважна з Іраку, якія апынуліся ў краіне транзытам празь Беларусь. У Літве, Польшчы альбо Латвіі ім удалося абмінуць і памежнікаў, і паліцыю і дабрацца да Нямеччыны.
  • Улады Польшчы зь верасьня распачалі затрыманьні і дэпартацыі людзей, якія дапамагаюць мігрантам нелегальна перасякаць мяжу. Сярод іх як грамадзяне Польшчы, так і грамадзяне Беларусі, краінаў Азіі, у тым ліку некаторыя асобы, што маюць від на жыхарства ў краінах Эўразьвязу. Супраць групы грамадзян Беларусі і Польшчы пачалі крымінальную справу за зьнішчэньне ўчасткаў калючага дроту, расьцягнутага на мяжы.
  • Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
  • Прэс-сакратар каардынатара спэцслужбаў Польшчы Станіслаў Жарын 27 верасьня заявіў, што 20% затрыманых мігрантаў маюць сувязі з Расеяй, пра што сьведчаць знойдзеныя доказы.
  • Міністар унутраных спраў і адміністрацыі Мар’юш Каміньскі сказаў, што беларускія памежнікі даюць мігрантам псыхатропныя сродкі, у тым ліку дзецям. Таксама ён заявіў, што чвэрць затрыманых мігрантаў мае дачыненьне да ўзброеных фармаваньняў на Блізкім Усходзе.
  • 30 верасьня ПАРЭ катэгарычна асудзіла практыку вяртаньня мігрантаў «у трэцюю краіну, дзе ім ня можа быць гарантавана міжнародная абарона», і нагадала Латвіі, Літве і Польшчы пра забарону на калектыўную высылку іншаземцаў. Усе папраўкі да тэксту рэзалюцыі, у якіх прапаноўвалася ўвесьці дадатковыя санкцыі супраць рэжыму Лукашэнкі ў выпадку новага абвастрэньня міграцыйнага крызісу, адхіліў профільны камітэт.
  • 4 кастрычніка польскія памежнікі знайшлі на беларуска-польскай мяжы ў Падляскім ваяводзтве муляж выбуховага прыстасаваньня. За некалькі дзён да гэтага паведамлялася, што беларускія памежнікі правакуюць польскіх, кідаючы ў іхны бок прадметы і накіроўваючы зброю.
  • 6 кастрычніка Памежная варта Польшчы паведаміла, што за жнівень і верасень спынілі звыш 14 тысяч мігрантаў, якія спрабавалі незаконна трапіць на тэрыторыю Польшчы зь Беларусі па-за межамі пунктаў пропуску. Акрамя таго, амаль штодня затрымлівалі памагатых мігрантаў, якія спрыялі парушэньню закону.
  • 8 кастрычніка Часовага паверанага ў справах Беларусі ў Польшчы Аляксандра Часноўскага выклікалі ў польскі МЗС у сувязі з сытуацыяй на мяжы. Варшава трактуе паводзіны беларускага боку, як «агрэсіўныя дзеяньні супраць Польшчы». Неаднаразова, зь відэадоказамі заяўлялася, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
  • 12 кастрычніка міністар нацыянальнай абароны Польшчы Марыюш Блашчак заявіў пра падрыхтоўку новага закону, згодна зь якім на польска-беларускай мяжы ўзьвядуць агароджу для супрацьдзеяньня нелегальнай міграцыі, скарыстаўшыся досьведам Вугоршчыны з 2015 году, калі тая змагалася з наплывам мігрантаў праз тэрыторыю Сэрбіі.
  • 14 кастрычніка, пасьля чарговай навіны пра сьмерць сырыйскага мігранта на мяжы, польскі Сэйм ухваліў папраўкі ў закон, які рэглямэнтуе пабудову агароджы з датчыкамі руху. Мігрантаў, якія незаконна перасеклі мяжу, дзяржаўным службам дазволілі высылаць з краіны, калі тыя зьвярнуліся па атрыманьне прыстанішча, прыбыўшы не з краін, дзе ім пагражала непасрэдная небясьпека.
  • Кіраўнік МЗС Нямеччыны Гайка Маас 18 кастрычніка заявіў: «Лукашэнка — кіраўнік дзяржаўнай сеткі перавозчыкаў нелегальных мігрантаў». Перад гэтым прафсаюз паліцыянтаў Нямеччыны выступіў за ўвядзеньне кантролю на мяжы з Польшчай з прычыны патоку мігрантаў. У Нямеччыну празь Беларусь нелегальным чынам на той момант трапілі звыш 4300 мігрантаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG