«На жаль, некаторыя калегі, запытаўшы сустрэчу, празь некаторы час ад яе адмовіліся. Як гэта зрабіў польскі калега, хоць нам ёсьць пра што пагаварыць і ёсьць што абмеркаваць. І па выніках гэтай размовы маглі б быць выпрацаваныя канкрэтныя напрамкі супрацоўніцтва. Але гэта таксама паказчык таго, як яны хочуць вырашаць тыя праблемы, якія знаходзяцца ў нашым парадку дня і якія павінны вырашацца», — цытуе Інтэрфакс выступ Макея ў эфіры тэлеканала СТВ у нядзелю.
«Мы гатовыя сябраваць з усімі. Я перакананы, што праз пару-тройку гадоў, як гэта паказваюць прыклады іншых дзяржаваў, зь якімі мы супрацоўнічаем, гэтыя партнэры могуць быць вельмі і вельмі пэрспэктыўнымі», — адзначыў міністар.
«Вядома ж, мы размаўлялі, давялі нашу пазыцыю аб сытуацыі ў краіне, пра пэрспэктывы разьвіцьця канстытуцыйнага працэсу. Давялі пазыцыю, што толькі толькі эвалюцыйны шлях разьвіцьця можа забясьпечыць посьпех у разьвіцьці дзяржавы і грамадзянскай супольнасьці, толькі ён прывядзе да сапраўднай дэмакратыі, пра якую многія так клапоцяцца. Практычна ўсе эўрапейскія калегі былі згодныя з гэтым», — паведаміў Макей.
Як паведамлялася раней, міністар замежных справаў Беларусі падчас Генэральнай асамблеі ААН сустрэўся зь кіраўнікамі МЗС чатырох эўрапейскіх дзяржаваў — Эстоніі, Вугоршчыны, Фінляндыі і Сэрбіі.
