Павал Харланчук выбіраў паміж Масквой і Кіевам, а перавагу расейскай сталіцы аддаў таму, што ў ёй больш акторскіх праектаў, ва ўкраінскай жа толькі раз на год. У Губэрнскі тэатар Масквы беларус пайшоў служыць, бо там прапанавалі ролю і дазваляюць паралельна здымацца ў кіно, сказаў Харланчук у інтэрвію «Нашай ніве».
Першага заробку Харланчук яшчэ не атрымліваў, а кватэру ў Маскве ён здымае сам.
«Выйшла адна прэм’ера на ютуб-канале — „Эльлі“, экспэрыментальны сэрыял з кароткімі эпізодамі. На Першым канале — сэрыял „Спытайце медсястру“. Здымаўся ў Карэна Аганэсяна, блізкага мне чалавека, у „Гульні на выжываньне“, другім сэзоне, гэта было ва Ўзбэкістане.
На сцэне буду граць у спэктаклі „Найшла каса на камень“ па Астроўскім. Выступаю 19 кастрычніка і 3 лістапада. Пакуль адзін спэктакль, але ёсьць яшчэ прапановы на дзьве ролі — у „Вішнёвым садзе“ на Пецю Трафімава і ў „Сірано дэ Бержэрак“».
У Менску на працу ў яго і іншых «непакорлівых» купалаўцаў, паводле Харланчука, — «чорны білет». Калі б выступленьні дазвалялі, то цалкам магчыма было б зьбіраць на іх аншлягі. Між іншым, актор адзначае, што цяпер у Купалаўскім тэатры служаць некаторыя людзі, якія асабіста выказвалі яму сваё меркаваньне аб адсутнасьці патрэбы ў беларускай мове.
Зараз у творчасьці Харланчука стане больш расейскай мовы, аднак па-беларуску ён размаўляе зь дзецьмі і на ёй думае. На радзіме ж прозьвішча актора прыбіраюць з афішаў, а рэкляму брэнду «Элема», у якой Харланчук зьняўся, неўзабаве таксама выдалілі.
