Лінкі ўнівэрсальнага доступу

Вярхоўны суд ліквідаваў аб’яднаньне прадпрымальнікаў «Пэрспэктыва»


Анатоль Шумчанка прамаўляе на форуме прадпрымальнікаў, архіўнае фота
Анатоль Шумчанка прамаўляе на форуме прадпрымальнікаў, архіўнае фота

Праваабарончае аб’яднаньне індывідуальных прадпрымальнікаў «Пэрспэктыва» праіснавала 15 гадоў — рашэньнем Міністэрства юстыцыі арганізацыю зарэгістравалі 17 лютага 2006 году.

Сутнасьць прэтэнзій, якія прывялі да ліквідацыі «Пэрспэктывы», яе нязьменны лідэр Анатоль Шумчанка да канца так і не зразумеў. Але мяркуе, што для прадпрымальніцкай супольнасьці гэта адчувальны ўдар.

«Пры ліквідацыі „Пэрспэктывы“ мяне аўтаматычна выключаць з рабочай групы ў пытаньнях дзейнасьці індывідуальных прадпрымальнікаў пры грамадзка-кансультатыўнай радзе Міністэрства эканомікі. Мала хто ведае гісторыю гэтага органа, які пры ўсім тым застаецца важнай дыялёгавай пляцоўкай для ІП і спосабам зваротнай сувязі з урадам i ведамствамі. Рабочая група зьявілася пасьля знакавага Форуму прадпрымальнікаў з удзелам 3000 дэлегатаў. Тады, проста на сцэне, у дэбатах з кіраўніком Дэпартамэнту прадпрымальніцтва я дамовіўся пра перамовы, каб зьняць крытычнае напружаньне», — адзначыў Анатоль Шумчанка.

Па яго словах, шматлікіх індывідуальных прадпрымальнікаў фактычна пазбавілі пляцоўкі, дзе яны маглі ўздымаць і вырашаць надзённыя пытаньні. Заўсёды шкада пакідаць тое, што створана супольнай працай, але такія цяперашнія рэаліі, падсумаваў Анатоль Шумчанка.

«Пэрспэктыва» была ініцыятарам рэзанансных вулічных выступаў прадпрымальнікаў, а таксама падтрымлівала акцыі пратэсту супраць павальнага прызнаньня беларусаў «дармаедамі».

Актыўных прадпрымальнікаў, уключна з Анатолем Шумчанкам, неаднаразова затрымлівалі, саджалі на суткі і выпісвалі буйныя штрафы. Апошні ператрус у лідэра «Пэрспэктывы» прайшоў 24 жніўня.

Ад пачатку ліпеня ў прадстаўнікоў беларускіх СМІ, няўрадавых і праваабарончых арганізацый адбываюцца ператрусы. Сьледчы камітэт тлумачыць гэта дачыненьнем СМІ і НДА да ценявым фінансавых схемаў. Паводле праваабаронцаў, у Беларусі ліквідаваныя або знаходзяцца ў працэсе ліквідацыі больш за 100 няўрадавых арганізацый.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG