Раскрыць гэтыя зьвесткі Байдэн абяцаў яшчэ падчас выбарчай кампаніі. Гэтага ж усе 20 гадоў патрабавалі й сваякі ахвяраў тэрактаў. Яны лічаць, што да нападу датычная Саудаўская Арабія, адкуль паходзіла большасьць сьмяротнікаў. Семʼі загінулых лічаць, што ФБР магло зьнішчыць гэтыя доказы, каб не псаваць стасункі Вашынгтону і Эр-Рыяду. Улады ЗША і Саудаўскай Арабіі гэтыя абвінавачаньні адкідаюць.
11 верасьня джыхадзісты захапілі чатыры пасажырскія самалёты. Два зь іх урэзаліся ў вежы-блізьняты Сусьветнага гандлёвага цэнтру на Манхэтане ў Нью-Ёрку, трэці — у Пэнтагон у Вашынгтоне. Каманда і пасажыры чацьвёртага самалёта спрабавалі адабраць кіраваньне ў захопнікаў. У выніку самалёт разьбіўся ў штаце Пэнсільванія, не даляцеўшы да мэты тэрарыстаў.
У выніку атак загінулі амаль тры тысячы чалавек. Тэракт стаў найбуйнейшым у гісторыі па колькасьці ахвяраў.
Адказнасьць за атакі ўзяла на сябе тэрарыстычная групоўка «Аль-Каіда». Заснавальнік групоўкі Усама бін Ладэн знаходзіўся ў Афганістане пад заступніцтвам тэрарыстычнай групоўкі «Талібан».
Адразу ж пасьля нападу Вашынгтон абʼявіў пра пачатак апэрацыі, мэтай якой было злавіць і судзіць бін Ладэна і іншых кіраўнікоў «Аль-Каіды». Гэта стала адной з прычынаў для ўводу войскаў ЗША ў Афганістан.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў