«Грузавік» амэрыканскай кампаніі SpaceX аддзяліўся ад другой ступені ракеты-носьбіта Falcon 9 і працягнуў палёт да МКС. А першая шматразовая ступень зрабіла пасадку на марскую плятформу ў Атлянтыцы. Трансьляцыя палёту вялася на сайце SpaceX.
Стыкоўка са станцыяй МКС пройдзе а 17:00 паводле менскага часу ў аўтаматычным рэжыме.
На МКС даставяць больш як 2 170 кг прадметаў першай неабходнасьці і абсталяваньня для экіпажу. Сярод іх сьвежыя прадукты харчаваньня — цытрыну, авакада, марозіва — для сямі астранаўтаў, якія цяпер знаходзяцца на МКС. А таксама матэрыялы для навуковых экспэрымэнтаў — у іх ліку мурашы і жабраногія ракападобныя.
Дасьледчыкі з Унівэрсытэту Вісконсына даслалі на МКС насеньне пустазельля, якое навукоўцы выкарыстоўваюць у якасьці мадэльных арганізмаў з прычыны іх прастаты і хуткага росту. У стане бязважкасьці выпрабуюць таксама ўзоры бэтону, сонечных элемэнтаў і іншых матэрыялаў.
Японскі стартап Gitai выпрабуе ў космасе рабатызаваную руку, якая ў будучыні павінна замяняць касманаўтаў пры іншых простых працах. Першыя выпрабаваньні правядуць унутры касьмічнай станцыі, але ў будучыні рабатызаваныя рукі маюць выкарыстоўваць у адкрытым космасе для рознага рамонту.
- Нацыянальнае ўпраўленьне па аэранаўтыцы і дасьледаваньню касьмічнай прасторы ЗША (NASA) карыстаецца паслугамі прыватных кампаній для дастаўкі іх на МКС з моманту закрыцьця сваіх шатлаў у 2011 годзе. SpaceX упершыню пачала перавозіць грузы ў 2012 годзе, і цяпер, дзякуючы гэтаму, NASA больш ня трэба цалкам спадзявацца на Расею пры адпраўцы сваіх астранаўтаў на арбітальную станцыю.
