У ноч з суботы на нядзелю польская Памежная варта вывезла з аддзелу ў мясцовасьці Шудзялова на Беласточчыне восем мужчын з Афганістану, Іраку і Емэну назад на мяжу зь Беларусьсю, нягледзячы на тое, што яны прасілі ў Польшчы прытулак і маюць там сваіх упаўнаважаных, піша Gazeta Wyborcza. Уцекачоў сустрэлі непадалёк ад мяжы польскія праваабаронцы, накармілі, запісалі іх асповед і ўзялі ад іх даверанасьці.
Мужчынам ад 20 да 40 гадоў. Тры афганцы, тры іракцы і два емэнцы. Яны скардзяцца на перасьлед у сваіх краінах. Асіб з Афганістану быў салдатам, супрацоўнічаў з амэрыканскай арміяй, якая іх навучала, паказваў супольныя здымкі. Ён лічыць, што вяртаньне на радзіму пагражае яму сьмерцю. Талібы ўжо пабывалі ў ягонай сям’і. Мухамад з Емэну быў прымусова прызваны ва ўзброеныя групы.
Мужчыны доўгі час блукалі па лесе па абодвух баках мяжы, некаторыя нават па два тыдні. Елі яблыкі і кукурузу з палёў. Галодныя, зьнясіленыя і напалоханыя, яны скардзіліся на гвалт з боку польскіх і беларускіх памежнікаў. Абодвух сілай прымусілі перасекчы мяжу. Уцекачы назвалі гэта пінг-понгам.
Паводле праваабаронцаў, мужчыны былі ў кепскім стане, частка зь іх не магла хадзіць. Двух афганцаў забралі ў шпіталь. Адным са сьведкаў быў польскі дэпутат Мацей Гдуля.
— Мы сустрэлі на тэрыторыі Польшчы пяць уцекачоў. У аднаго зь іх запаленьне лёгкіх і ён ня мае сілы хадзіць. Ён атрымаў дапамогу ад лекара. У іх ёсьць упаўнаважаныя асобы ў Польшчы, і яны хочуць міжнароднай аховы ў Польшчы. Памежная варта павінна выконваць працэдуры", — сказаў палітык.
Вяртаньне ўцекачоў назад у Беларусь дазволіў адмысловым дакумэнтам міністар унутраных справаў і адміністрацыі Мацей Вонсік. Паводле выданьня Gazeta Wyborcza, пастанова міністра пярэчыць Жэнэўскай канвэнцыі, канстытуцыі і была выдадзеная з перавышэньнем паўнамоцтваў.
23 жніўня Аляксандар Лукашэнка ўсклаў адказнасьць за канфлікт на беларуска-польскай мяжы на Польшчу. Паводле яго, польскія памежнікі сілай, пагражаючы зброяй, выдаляюць уцекачоў на тэрыторыю Беларусі, прымушаючы парушаць закон.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў