Аб гэтым пішуць «РИА Новости» са спасылкай на адваката.
Блогер быў затрыманы ў верасьні 2020 году. Свайму брату ён паведаміў, што нагодай стала інтэрвію расейскаму выданьню «Украина.ру». Яно ўваходзіць у дзяржаўны холдынг «Росия сегодня». У відэа, апублікаваным на ютуб-канале выданьня ў траўні летась, Тайчыбекаў гаворыць зь вядоўцай на фоне чорна-жоўта-белага сьцяга Расейскай імпэрыі і сьцьвярджае, што ўлады Казахстану праводзяць русафобскую палітыку.
Паводле яго, улады Казахстану з 2020 году «знаходзяць спэцыяльна расейскіх людзей, і яны выступаюць з ініцыятывамі забараніць расейскую тэлевізію, забараніць расейскую мову, выключыць яе з Канстытуцыі». На думку Тайчыбекава, гэта адбываецца таму, што ў Казахстане «усё накіравана на тое, каб прынізіць іншыя нацыі».
У 2015 годзе блогер ужо быў прыгавораны да чатырох гадоў пазбаўленьня волі паводле артыкулу аб распальваньні нацыянальнай варожасьці за публікацыі ў сацыяльных сетках. Ён сваёй віны не прызнаваў і лічыў справу палітычна матываванай. У кастрычніку 2017 году Тайчыбекаў выйшаў з турмы датэрмінова.