13 жніўня прадстаўнікі заснавальніка кампаніі «Трайпл» зноў занялі абарону каля ягонага дома, піша «Народная воля».
Сам Юры Чыж ужо некалькі месяцаў знаходзіцца ў СІЗА КДБ. Што канкрэтна яму інкрымінуецца, дакладна невядома: прадстаўнікі КДБ, Сьледчага камітэту, КДК і ДФР падрабязнасьцяў не паведамляюць.
Гэта ўжо ня першая спроба судовых выканаўцаў увайсьці ў дом бізнэсоўца. Вось што раней казаў выданьню адвакат Міхаіл Макараў:
«Уступiла ў законную сілу рашэньне суду Цэнтральнага раёну Менску аб прымусовым ускрыцьці дома Чыжа ў Лагожаску, — патлумачыў юрыст. — Усё адбываецца ў рамках спагнаньня доўгу, які належыць Мікалаю Чукісаву. Сума — каля 300 тысяч рублёў па выканаўчай вытворчасьці 2019 году, але ўсё цягнецца па гэты дзень».
Адвакаты Юрыя Чыжа спрабавалі абскардзіць рашэньне суду, але беспасьпяхова.
Перад гэтым судовыя выканаўцы спрабавалі трапіць у дом Юрыя Чыжа 30 ліпеня, нават адчынілі браму. Аднак відавочцы расказалі, што «бок даўжніка падаў скаргу на дзеяньні судовага выканаўцы».
«Мабыць, даўжніка і яго прадстаўнікоў неналежным чынам апавясьцілі, таму судовыя выканаўцы адмовіліся ад працягу сваіх дзеяньняў у гэты дзень — усё перанесьлі на іншую дату», — растлумачыў «Народнай волі» адвакат Мікалая Чукісава.
Дачка заснавальніка кампаніі «Трайпл» зьвярнулася з заявай у пракуратуру Менскай вобласьці пра незаконнае ўварваньне ў жыльлё і іншыя ўладаньні, якія належаць іх сям’і.
Тацяна Чыж просіць правесьці праверку дзеяньняў і прыцягнуць да крымінальнай адказнасьці ўсіх, хто, на яе думку, незаконна уварваўся на яе і бацькаў зямельны ўчастак.