«Сьледчая камісія пад кіраўніцтвам дыпкорпусу ў Маскве створана для высьвятленьня абставінаў здарэньня, у выніку якога ў зоне літоўска-беларускай мяжы загінуў грамадзянін Іраку. Члены камісіі ўжо сустрэліся з прадстаўнікамі профільных органаў ва ўрадзе Беларусі для ўдакладненьня дэталяў інцыдэнту», — заявіў ас-Саххаф, якога цытуе Tut.by.
Камэнтуючы рашэньне ірацкіх уладаў аб прыпыненьні ўсіх пасажырскіх авіярэйсаў у Беларусь, прадстаўнік ірацкага МЗС адзначыў, што «мэта такога рашэньня заключаецца ў тым, каб пакласьці канец дзейнасьці сетак кантрабанды і гандлю людзьмі».
9 жніўня авіякампанія Fly Baghdad выканала рэйс зь Менску ў Багдад, вярнуўшы на радзіму больш за восемдзесят іракцаў. Яшчэ адзін эвакуацыйны рэйс чакаецца заўтра: на ім плянуюць вывезьці больш за 200 чалавек, а таксама цела іракца Джафара Аль-Харэса, што загінуў на беларуска-літоўскім участку.
Таксама сёньня ў парлямэнце Іраку прайшлі слуханьні па сытуацыі на літоўска-беларускай мяжы. На іх было заяўлена, што Ўпраўленьне Вярхоўнага камісара Арганізацыі Аб’яднаных Нацый па справах уцекачоў аказвае гуманітарную падтрымку іракцам «шляхам зносін з уладамі Літвы і Беларусі».