Лінкі ўнівэрсальнага доступу

Ціманоўская заклікала да санкцый у дачыненьні да трэнэра, які вырашыў адправіць яе дадому


Крысьціна Ціманоўская

Спрынтэрка Крысьціна Ціманоўская заклікала разгледзець магчымасьць увядзеньня санкцый у дачыненьні да трэнэра, які прыняў рашэньне адправіць яе дадому з Алімпійскіх гульняў у Токіё.

Пра гэта паведамляе агенцтва AP.

У інтэрвію агенцтву ў фармаце відэазванка Ціманоўская таксама заклікала міжнародныя спартовыя ўлады расьсьледаваць інцыдэнт — высьветліць, «хто даў указаньне, хто прыняў рашэньне, што я больш не магу ўдзельнічаць у спаборніцтвах», — сказала спартоўка.

Ціманоўская пацьвердзіла агенцтву выказаную раней упэўненасьць, што пасьля вяртаньня ў Беларусь яе чакала б пакараньне. «Яны ясна далі зразумець, што па вяртаньні дадому я абавязкова сустрэнуся з той ці іншай формай пакараньня», — заявіла 24-гадовая лёгкаатлетка, якая адмовілася вяртацца ў Менск, атрымала польскую візу і ў бліжэйшыя дні вылеціць у Варшаву.

Польскія ўлады запэўнілі Крысьціну Ціманоўскую, што ў Польшчы яна атрымае дапамогу і зможа працягнуць спартовую кар’еру.

Крысьціна Ціманоўская і яе адмова вяртацца ў Беларусь

  • 1 жніўня 24-гадовая лёгкаатлетка Крысьціна Ціманоўская заявіла, што яе спрабавалі сілай вывезьці з Токіё ў Беларусь. Яна адмовілася ад пасадкі на самалёт і заявіла, што ў аэрапорт яе даставілі супраць волі.
  • Ціманоўскую выключылі з алімпійскай каманды пасьля таго, як яна выступіла з крытыкай трэнэрскага складу ў сваім Instagram. Яе паставілі бегчы эстафэту 4×400 мэтраў, хоць на Алімпіядзе Крысьціна рыхтавалася выступіць у бегу на 100 і 200 мэтраў.
  • Гэта здарылася пасьля таго, як Марыю Жодзік, Ганну Міхайлаву і Крысьціну Мулярчык не дапусьцілі да эстафэты з прычыны недастатковай колькасьці допінг-пробаў. Жодзік абвінаваціла ў гэтым Беларускую фэдэрацыю лёгкай атлетыкі. Ціманоўская, у сваю чаргу, заявіла, што ніколі ня бегала дыстанцыю, на якую яе без папярэджаньня выстаўляе трэнэрскі штаб.
  • Неўзабаве пачаліся пагрозы ад адміністрацыі каманды і галоўнага трэнэра зборнай у лёгкай атлетыцы Юрыя Маісевіча. Функцыянэры спачатку ігнаравалі пытаньні Ціманоўскай наконт удзелу ў няпрофільнай для яе эстафэце, куды атлетку ўключылі безь яе згоды, а затым пачалі пагражаць, заяўляючы, што рашэньне пра яе «выдаленьне з Алімпіяды» прынятае «на самым версе». Крысьціна апублікавала, а потым выдаліла аўдыязапіс з пагрозамі.
  • Ціманоўская заявіла, што ў Беларусь ня вернецца, бо баіцца перасьледу. 2 жніўня яна прыйшла ў польскую амбасаду, дзе ёй выдалі гуманітарную візу. У той жа дзень стала вядома, што яе муж Арсень Зданевіч зьехаў зь Беларусі ва Ўкраіну.
  • Трэцяга жніўня Ціманоўская з Токіё паразмаўляла з прэм’ер-міністрам Польшчы Матэвушам Маравецкім.
  • 4 жніўня быў заплянаваны пералёт спартоўкі ў Варшаву, у апошні момант зь меркаваньняў бясьпекі Варшаву зьмянілі на Вену. У аэрапорце Токіё перад вылетам у Аўстрыю Ціманоўская зьявілася ў суправаджэньні афіцэраў японскай паліцыі.
  • 5 жніўня Ціманоўская прыбыла ў Варшаву і дала прэсавую канфэрэнцыю.
  • 6 жніўня Міжнародны алімпійскі камітэт паведаміў, што «ў інтарэсах дабрабыту спартоўцаў Беларусі» скасаваў акрэдытацыю двух трэнэраў Ціманоўскай, Артура Шумака і Юрыя Маісевіча, і пачаў расьсьледаваньне інцыдэнту.
  • 10 жніўня Крысьціна Ціманоўская падпісала кантракт са спартовай групай Orlen. У польскай камандзе адзначылі, што спадзяюцца на хуткае аднаўленьне кар’еры беларускі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG