Беларускія студэнты могуць атрымаць стыпэндыю для вучобы ў Кіева-Магілянскай акадэміі

Як паведамілі ва ўнівэрсытэце, гэтую ініцыятыву Кіева-Магілянская акадэмія рэалізуе ў партнэрстве зь міжнародным фондам «Адраджэньне» і беларускай арганізацыяй ва Ўкраіне Free Belarus Center.

Студэнты могуць далучыцца да зьмешанага вочна-завочнага фармату навучаньня ў якасьці слухачоў у трох праграмах:

• міні-спэцыялізацыі (пасьля 10 месяцаў навучаньня выдаецца сэртыфікат)
• вывучэньне курсу «Украінская мова ў кантэксьце» (4 месяцы навучаньня)
• выбар дысцыплін паводле ўласных прыярытэтаў цягам двух ці аднаго сэмэстраў (навучаньне ад 4 да 10 месяцаў).

Заяўкі ад беларускіх студэнтаў будуць прымаць да 27 жніўня, а сумоўе на атрыманьне стыпэндыяльнай падтрымкі адбудзецца 30–31 жніўня.

У лістападзе 2020 году Нацыянальны ўнівэрсытэт «Кіева-Магілянская акадэмія» распрацаваў адмысловую праграму навучаньня для беларускіх студэнтаў, выключаных з вышэйшых навучальных установаў у Беларусі за сваю актыўнасьць.

У прыватнасьці, беларускім студэнтам прапанавалі праграму паступленьня на першы курс і працяг навучаньня з другога курсу паводле бакалярскіх і магістарскіх праграмаў той жа вартасьці, што і для ўкраінскіх студэнтаў.

ГЛЯДЗІЦЕ ТАКСАМА:

Адзін з найбольш прэстыжных унівэрсытэтаў Украіны распрацаваў спэцыяльную праграму для студэнтаў зь Беларусі

У верасьні 2020 году выкладчыкі, студэнты, супрацоўнікі і выпускнікі Кіева-Магілянскай акадэміі заявілі пра салідарнасьць з грамадзянамі Беларусі, якія выйшлі на мірныя акцыі пратэсту супраць фальсыфікацыяў на выбарах. Асобна яны выказалі падтрымку студэнтам, якіх пачалі перасьледаваць нават ва ўнівэрсытэтах.

«Мы, магілянцы, былі сярод ініцыятараў і актыўных удзельнікаў Аранжавай рэвалюцыі і Рэвалюцыі годнасьці. Мы ведаем, што кожны чалавек мае права на свабоду і годнасьць. Мы перакананыя, што кожны чалавек мае права абараняць і абараняцца, калі гэтыя асноўныя прынцыпы парушаюцца», — адзначалася ў заяве.

ГЛЯДЗІЦЕ ТАКСАМА:

Беларускія студэнты са студзеня будуць вучыцца ў Кіева-Магілянскай акадэміі. У Беларусі ўгледзелі ў гэтым «сэпаратызм»

Кіева-Магілянская акадэмія мае 400-гадовую гісторыю і цяпер ужо статус нацыянальнага ўнівэрсытэту. Званьне ганаровага доктара гэтай установы мае Сьвятлана Алексіевіч, выбітная беларускай пісьменьніца, ляўрэатка Нобэлеўскай прэміі ў галіне літаратуры 2015 году.

ГЛЯДЗІЦЕ ТАКСАМА:

У Польшчы адкрылі дыстанцыйную «Беларускую акадэмію». Пачалі з падрыхтоўкі спэцыялістаў для дзяржорганаў

ГЛЯДЗІЦЕ ТАКСАМА:

У ЭГУ адкрываецца надзвычайны фонд падтрымкі студэнтаў зь Беларусі. Швэцыя дае на яго 100 000 эўра