Лінкі ўнівэрсальнага доступу

Ля Бягомля паставілі помнік ахвярам савецкіх рэпрэсіяў


Урочышча Кабыляцкая гара месца расстрэлу ахвяраў сталінскіх рэпрэсій, 2018. Ілюстрацыйнае фота

У вёсцы Будзілаўка каля Бягомля паставілі і асьвяцілі памятны знак ахвярам савецкіх рэпрэсіяў. Пад помнік паклалі зямлю з Кабыляцкай гары – месца масавых расстрэлаў пад Оршай.

Ідэя ўстаноўкі помніка і пасадкі бярозавага гаю належыць выхадцу з Будзілаўкі, доктару гістарычных навук, прафэсару Мікалаю Печаню. Ён сабраў зьвесткі аб сваіх рэпрэсаваных родных і аднавяскоўцах, зьезьдзіў у Оршу, прывёз зямлю з Кабыляцкай гары, дзе ў гады рэпрэсій расстралялі больш за 20 тысяч чалавек, паведамляе докшыцкі сайт «Родныя вытокі».

  • Кабыляцкую гару называюць яшчэ Аршанскімі Курапатамі, яна афіцыйна прызнаная месцам масавых расстрэлаў.

У Будзілаўцы ўнукі і праўнукі тых, чые імёны запісаны на чорнай пліце, заклалі капсулу з зямлёй ля падножжа вялікага каменя. Пасьля памінальнага набажэнства, які адслужыў іярэй Аляксей Кушнярэвіч, памяць загінулых ушанавалі хвілінай маўчаньня.

Аршанскія курапаты: што важна ведаць

  • У 1982 годзе, калі будавалі чыгунку ва ўрочышчы Кабыляцкая гара, знайшлі чалавечыя парэшткі. Створаная ў Воршы адмысловая камісія афіцыйна прызнала, што гэта парэшткі ахвяраў сталінскіх рэпрэсій. Кабыляцкая гара была прызнана месцам масавых расстрэлаў упершыню ў Беларусі — раней за менскія Курапаты.
  • Першы помнік ахвярам сталінскіх рэпрэсій зьявіўся тут у 1990 годзе, яшчэ ў часы СССР. Паводле распараджэньня тагачасных уладаў Воршы тут паставілі стандартную жалезную «тумбачку» — сапраўдны помнік меліся зрабіць пазьней.
Часовы помнік на Кабыляцкай гары, усталяваны ў 1990г. ( фота з архіву Віктара Андрэева)
Часовы помнік на Кабыляцкай гары, усталяваны ў 1990г. ( фота з архіву Віктара Андрэева)
  • У 1994 годзе на прапанову аршанскага гісторыка Юрыя Копціка замест помніка на Кабыляцкай гары паставілі камень-валун, а на ім — шыльду з радкамі Ганны Ахматавай: «Хотелось бы всех поименно назвать, да отняли список и негде узнать». Неўзабаве шыльду скралі вандалы, сьледам за ёй і наступную.
Помнік-камень прастаяў без шыльды 24 гады
Помнік-камень прастаяў без шыльды 24 гады
  • Пасьля 1994 году мясцовыя ўлады забыліся на помнік. Чыноўнікі сюды не зьяўляліся ні разу, але грамадзкія актывісты штогод зьбіраліся на Дзяды і займаліся добраўпарадкаваньнем гэтых мясьцін. У сярэдзіне 1990-х тут пачаў стыхійна стварацца самаробны мэмарыял: нашчадкі рэпрэсаваных пачалі ставіць крыжы і помнікі ў памяць пра сваіх родных.
Самаробны мэмарыял у лесе
Самаробны мэмарыял у лесе
  • Кабыляцкая гара — не адзінае месца сталінскіх расстрэлаў, вядомае аршанцам. Старажылы кажуць, што ў 1930-я гады расстрэлы адбываліся і ў Харкаўскім лесе каля магілёўскай шашы, і ў мясцовай турме, якую зрабілі ў мурах езуіцкага калегіюму. Нашчадкі рэпрэсаваных і мясцовыя актывісты хочуць паставіць памятныя знакі і ў гэтых месцах.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG