Прэзыдэнт Украіны Уладзімір Зяленскі падпісаў указ аб увядзеньні эканамічных санкцыяў супраць расейскай інтэрнэт-крамы Wildberries.
У санкцыйным сьпісе апынуліся ўкраінскае, расейскае, польскае, армянскае, беларускае, кіргіскае і казахстанскае падразьдзяленьні кампаніі.
У Беларусі, як адзначае «Наша ніва», мае 100 гандлёвых пунктаў.
Пад пэрсанальныя санкцыі Ўкраіны трапілі 4 топ-мэнэджеры Wildberries, у тым ліку і заснавальніца гэтай інтэрнэт-крамы Тацяна Бакальчук.
Сёлета Бакальчук стала найбагацейшай жанчынай Расеі. З пачатку года яна зарабіла 443 мільёны даляраў, яе актывы дасягнулі 9,53 мільярда даляраў.
Санкцыі супраць Wildberries былі ўведзеныя ва Ўкраіне за тое, што ў анлайн-краме прадавалася ў тым ліку форма і сымболіка расейскай арміі. Пра гэта ў Telegram паведаміў міністар культуры і інфармацыйнай палітыкі краіны Аляксандр Ткачэнка.
«Расейскі рытэйл, які, апроч іншага, прадае расейскую прапаганду і форму расейскіх салдатаў, ня будзе працаваць ва Ўкраіне. Гаворка ідзе пра Wildberries», — напісаў міністар.
Усе актывы кампаніі блякуюцца, забараняецца транзыт рэсурсаў, пералёты і перавозкі праз тэрыторыю Ўкраіны. Уводзіцца забарона на перадачу ім тэхналёгіяў і правоў інтэлектуальнай уласнасьці, а таксама забарона на вывад капіталу з тэрыторыі Ўкраіны.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў