Дакладная прычына сьмерці Лексы Лашкаравы пакуль не называецца.
Журналісцкая супольнасьць Грузіі, а таксама апазыцыйныя партыі ўскладаюць адказнасьць за падзеі 5 ліпеня на ўлады краіны, якія, на думку часткі грамадзкасьці, не змаглі прадухіліць жорсткі пагром, у тым ліку зьбіцьцё больш як паўсотні журналістаў перад акцыяй на цэнтральным праспэкце Руставэлі.
У той дзень радыкалы сарвалі марш у падтрымку правоў ЛГБТ. Натоўп напаў на ўдзельнікаў заплянаванага шэсьця і журналістаў, якія асьвятлялі падзею. Нападу падвергліся у тым ліку супрацоўнікі Грузінскай службы Радыё Свабода Тарніке Мандарыя і Дато Карыдзэ. Паліцыя ня ўмешвалася, хоць пазьней МУС Грузіі заявіла, што ў дачыненьні да нападнікаў пачата некалькі крымінальных справаў.
Прэм’ер-міністар Іраклі Гарыбашвілі назваў правядзеньне «Маршу годнасьці» у цэнтры сталіцы нямэтазгодным, папярэдзіўшы, што акцыя можа прывесьці да грамадзянскага супрацьстаяньня.
Супраць прайду таксама выступілі прадстаўнікі Грузінскай праваслаўнай царквы.
