Амбасадар Эўрапейскага зьвязу ў Менску Дырк Шубэль, які пакінуў Менск на патрабаваньне МЗС Беларусі, падзякаваў амбасадарцы Швэцыі Крысьціне Ёханэсан і іншым калегам за апошнюю сустрэчу ў Менску.
«Я пакінуў Беларусь сёньня і адправіўся на „кансультацыі“ ў Брусэль, як таго запатрабавала беларускае МЗС, і такім чынам падзяліў лёс маіх польскіх, літоўскіх і латвійскіх калег. Нашу калегу з ЗША нават не пусьцілі».
Таксама Шубэль напісаў, што Беларусь сёньня ўжо ня тая краіна, у якую ён прыехаў 22 месяцы таму. Аднак ён мае веру ў тое, што беларусы пераадолеюць усе цяжкасьці і пабудуюць свабоднае і гасьціннае грамадзтва. Шубэль спадзяецца неўзабаве вярнуцца ў краіну, у якой працаваў амаль два гады.
«А пакуль мае думкі застаюцца таксама з кожным палітвязьнем, з кожным чалавекам, зь якім абыходзіліся несправядліва, зь іх сямейнікамі, з тымі, хто страціў сваіх блізкіх у мінулым „турбулентным“ годзе», — дадаў Шубэль.
Дыплямат паабяцаў працягваць працаваць і ў Брусэлі дзеля будучыні свабоднай Беларусі.
