Лінкі ўнівэрсальнага доступу

Жонка зьняволенага Пачобута даведалася пра стан мужа, хворага на COVID-19


Анджэй Пачобут, архіўнае фота
Анджэй Пачобут, архіўнае фота

Аксана Пачобут здолела пагаварыць па ўнутраным тэлефоне з турэмным лекарам у жодзінскім СІЗА, дзе ўтрымліваюць журналіста Анджэя Пачобута. Ён застанецца на карантыне да 8 ліпеня.

Як расказала Аксана Пачобут, тэст на каранавірус Анджэю зрабілі толькі 16 чэрвеня. Карантын скончыцца праз 21 дзень — 8 ліпеня. Сам журналіст здолеў перадаць на волю, што захварэў, 11 чэрвеня.

Увесь час карантыну адвакат ня зможа наведваць палітвязьня. Апошні ліст, які прыйшоў жонцы ад Анджэя, датаваны 8 чэрвеня. Там ён піша, што ягонае самаадчуваньне пагаршаецца, зьбіваецца сардэчны рытм.

Цяпер Пачобут знаходзіцца ў інфэкцыйнай камэры пад назіраньнем. Калі паўторны тэст 29 чэрвеня будзе адмоўны, то яго перавядуць у звычайную камэру, дзе карантын працягнецца.

Анджэй прымае лекі, яму прызначылі антыбіётык, бо мае высокую хуткасьць асяданьня эрытрацытаў. Тэмпэратуру і сатурацыю яму мераюць. Лекар кажа, што яны ў норме.

Анджэй Пачобут зьняволены ўжо тры месяцы ў «польскай справе». Яму пагражае да 12 гадоў калёніі за «распальваньні варожасьці». Яму прапаноўвалі вызваленьне ўзамен на выезд зь Беларусі. Ён адмовіўся. У Анджэя хворае сэрца, раней, асабліва ў сьпёку, у яго часта здараліся прыступы, ён слабеў, клаўся ў шпіталь праз парушаны рытм сэрца.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG