«Спроба прызнаць гэтую інфармацыйную прадукцыю экстрэмісцкай падобная да таго, што ўвесь час цяпер спрабуюць зрабіць нашы кантрольныя органы — нацягнуць саву на глёбус».
Старшыня Беларускай асацыяцыі журналістаў Андрэй Бастунец пракамэнтаваў «Салідарнасьці» імкненьне ўладаў прызнаць экстрэмісцкімі матэрыялы парталу Tut.by.
«Працягваецца праца, накіраваная на тое, што называецца «разгром Tut.by», — заявіў старшыня БАЖ Андрэй Бастунец. — Спачатку іх пазбавілі статусу СМІ, потым распачалі справу на 15 супрацоўнікаў і зьвязаных з парталам асоб. Потым быў заблякаваны партал. Цяпер мы бачым, што яны гэтае блякаваньне спрабуюць абгрунтаваць прызнаньнем экстрэмісцкімі матэрыялаў самога сайта.
На самой справе, як і пішуць супрацоўнікі, гэта можа выклікаць вельмі сур’ёзныя, практычна невырашальныя ў прававым полі праблемы, зьвязаныя з тым, што прадукцыя Tut.by разьмяшчалася на велізарнай колькасьці інфармацыйных рэсурсаў, у тым ліку і дзяржаўных».
Старшыня БАЖ ня лічыць выстаўленыя парталу абвінавачаньні правамернымі і абʼектыўнымі.
«Права да гэтага ня мае ніякага дачыненьня. Таму што сярод прэтэнзій, пазначаных у рашэньні камісіі, можна, напрыклад, убачыць высьмейваньне або нэгатыўныя ацэнкі каго б там ні было. Але і тое, і другое цалкам ахоўваецца свабодай выказваньня меркаваньняў.
Калі мы возьмем асноватворны дакумэнт „Міжнародны пакт аб грамадзянскіх і палітычных правах“ і тыя рашэньні Камітэту ААН па правах чалавека, якія прынятыя ў адпаведнасьці зь ім, то ўбачым, што СМІ мае магчымасьць выказваць ня толькі папулярныя выказваньні або такія, якія ўхваляюцца ў грамадзтве, але і непапулярныя, і рэзка крытычныя.
Варта адзначыць, што Tut.by многія абвінавачвалі, хутчэй, у залішняй нэўтральнасьці. І спроба прызнаць гэтую інфармацыйную прадукцыю экстрэмісцкай падобная да таго, што ўвесь час цяпер спрабуюць зрабіць нашы кантрольныя органы — нацягнуць саву на глёбус», — адзначыў Бастунец.
Ён падкрэсьліў, што Беларуская асацыяцыя журналістаў у абавязковым парадку працягне інфармаваць усю сусьветную грамадзкасьць пра тое, што адбываецца.
«Мы праводзім гэтую працу кожны дзень, але такія выпадкі, як з Tut.by, або як крымінальны перасьлед журналістаў, — яны першачарговыя, найважнейшыя і самыя значныя.
Мы будзем спрабаваць прыцягнуць да ўсяго гэтага ўвагу як грамадзкасьці, так і дзяржаўных структур, міжнародных. А таксама мы абавязкова зьвяртаемся да беларускіх уладаў, але, на жаль, гэтыя нашы звароты застаюцца не пачутымі», — заявіў старшыня БАЖ.