Лінкі ўнівэрсальнага доступу

Парлямэнт Альбаніі прагаласаваў за імпічмэнт прэзыдэнту


Ілір Мэта, прэзыдэнт Альбаніі

Парлямэнт Альбаніі выказаўся за адстаўку прэзыдэнта краіны Іліра Мэты. Імпічмэнт ініцыяваў лідэр сацыялістаў і дзейны прэм’ер-міністар Эдзі Рама

Пра гэта паведамляе Euronews.

Рама і яго прыхільнікі абвінавацілі кіраўніка дзяржавы ў адкрытай падтрымцы апазыцыі напярэдадні красавіцкіх парлямэнцкіх выбараў, што, на іх думку, парушае Канстытуцыю.

Эдзі Рама, прэм'ер-міністар Альбаніі
Эдзі Рама, прэм'ер-міністар Альбаніі

«Ілір Мэта растаптаў Канстытуцыю Рэспублікі Альбанія, разбурыў інстытут гаранта нацыянальнага адзінства, — заявіў дэпутатам Рама. — Ён перайшоў этычную мяжу падзелу ўладаў у нашай парлямэнцкай дэмакратыі. Ілір Мета зганьбіў Альбанію і альбанскі народ празь асаблівыя сувязі са Злучанымі Штатамі Амэрыкі. Гэты чалавек сапсаваў рэпутацыю Альбаніі перад тварам міжнароднай дэмакратычнай супольнасьці».

Супярэчнасьці паміж прэзыдэнтам і прэмʼерам абвастрыліся напярэдадні красавіцкіх выбараў, калі былі зафіксаваныя парушэньні і сутыкненьні прыхільнікаў розных партый. Мэта публічна крытыкаваў Раму, абвінавачваючы яго ў злоўжываньні адміністрацыйным рэсурсам і ціску на выбарнікаў. Сацыялісты, атрымаўшы парлямэнцкую большасьць, неўзабаве паставілі пытаньне аб недаверы прэзыдэнту.

Канчатковы лёс прэзыдэнта павінен вырашыць Канстытуцыйны суд. Сам кіраўнік дзяржавы ужо назваў імпічмэнт незаконным.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG