4 чэрвеня Сьвятлана Ціханоўская падчас візыту ў Варшаву сустрэлася з прэзыдэнтам Польшчы Анджэем Дудай.
Як паведамляе прэсавая служба Ціханоўскай, яна падзякавала прэзыдэнту Дуду за ініцыяваны Польшчай і прыняты Эўразьвязам плян дапамогі для дэмакратычнай Беларусі і ўсебаковую дапамогу Беларусі: праграму імя Каліноўскага, падтрымку незалежных СМІ, у тым ліку «Белсату», дапамогу людзям і бізнэсам, якім давялося пераехаць, падтрымку Цэнтру беларускай салідарнасьці і Беларускага дома.
Анджэй Дуда адзначыў, што «у інтарэсах Рэспублікі Польшча, каб за нашай усходняй мяжой існавала сувэрэнная, незалежная дзяржава, якая мае свае ўласныя справы, кіруецца дэмакратычнымі прынцыпамі, у якой людзі жывуць свабодна, удзельнічаюць у выбарах, маючы перакананьне, што іх галасы ўлічваюцца і ўплываюць на вынікі выбараў. Іншых чаканьняў у Польшчы няма», — сказаў ён.
Прэзыдэнт Польшчы адзначыў, што палякі і беларусы — дзьве братнія нацыі:
«Мы жадаем нашым суседзям самага найлепшага. Мы хочам, каб вы мелі сувэрэную дзяржаву і самі ёю кіравалі»,— сказаў Дуда. Ён падкрэсьліў, што імкненьне да свабоды — адно з правоў беларусаў.
«Мы як польскія ўлады хацелі б, каб вы мелі магчымасьць выконваць гэтае права», — дадаў прэзыдэнт Дуда.
На сустрэчы абмеркавалі:
- Як дапамагчы бацькам Пратасевіча і пераканацца, што вінаватыя ў захопе самалёта панясуць адказнасьць;
- Як паскорыць працэс завядзеньня спраў ува ўнівэрсальнай юрысдыкцыі ў Польшчы, бо ў гэтую краіну зьехала шмат беларусаў, якія ратаваліся ад перасьледу рэжыму;
- Як узмацніць эканамічны і палітычны ціск на Лукашэнку з дапамогай санкцый і прызнаньня рэжыму тэрарыстычным.
«Усе нявінныя людзі мусяць выйсьці на свабоду. Гэта ня можа быць прадметам гандлю. Мы бачылі, у якім стане Раман — ён закладнік рэжыму, і мы павінны зрабіць усё, каб вызваліць Рому і тысячы людзей, якія знаходзяцца ў такіх жа нялюдзкіх умовах», — заявіла Ціханоўская.
Раніцай Ціханоўская сустрэлася з мэрам Варшавы Рафалам Тшаскоўскім — з нагоды адкрыцьця мэмарыялу беларускай салідарнасьці.
Падчас урачыстага адкрыцьця помніка «Салідарнасьці» ў Варшаве Сьвятлана Ціханоўская сказала:
«На жаль, палітычны крызіс у маёй краіне паглыбляецца. Пасьля акту дзяржаўнага тэрарызму з прымусовай пасадкай самалёту Ryanair супрацьстаяньне ў Беларусі стала праблемай ня толькі для Эўропы, а і ўсёй міжнароднай супольнасьці. Але я ўпэўненая: на гэты выклік мы ўсе разам знойдзем эфэктыўны адказ. Як адказам палякаў у 1980-я стала «Салідарнасьць». Ня проста назва прафсаюзу, а тая ўзаемная падтрымка, якая аб’яднала ўсё польскае грамадзтва і зламала таталітарную сыстэму«,— заявіла Ціханоўская.
