Маскоўскі авіярэйс у Вільню паляцеў у абыход Беларусі
Сёньняшні рэйс расейскай авіякампаніі «Руслайн» з маскоўскага аэрапорта «Внуково» ў Вільню вылецеў амаль з гадзінным спазьненьнем, аднак даляцеў і прызямліўся ў Вільні. Ягоны маршрут быў зьменены ў абыход Беларусі, ляцеў ён над Латвіяй.
Урад Эстоніі перапыніў наўпроставыя авіязносіны з Беларусьсю, паведаміў партал Delfi.
Паводле рашэньня ўраду, самалётам Беларусі, а таксама тым, што вылятаюць зь яе тэрыторыі забаронена зьдзяйсьняць пасадку на тэрыторыі Эстоніі, а таксама ўзьлятаць зь яе аэрапортаў або пралятаць у паветранай прасторы Эстоніі.
Менск просіцца больш лятаць у Расею і скардзіцца на санкцыі. Масква адгаворваецца пандэміяй
Прэм’ер-міністар Беларусі Раман Галоўчанка папрасіў прэмʼер-міністра Расеі Міхаіла Мішусьціна аднавіць дакавідны ўзровень авіяпералётаў і «адкрыць для палётаў беларускай авіякампаніі новыя напрамкі. У прыватнасьці, аэрапорты Сочы і Краснадара». Міхаіл Мішусьцін адгаварыўся, што «рашэньне аб пашырэньні транспартных зносін зь Беларусьсю не зьяўляецца палітычным і цалкам залежыць ад сытуацыі з пандэміяй».
Адмянілі яшчэ адзін рэйс Парыж-Масква
Стала вядома, што яшчэ адзін рэйс AirFrance з Парыжу ў Маскву, заплянаваны на 28 траўня, таксама адмянілі, бо расейскія ўлады не ўхвалілі плян палёту ў абыход Беларусі.
Cancelled. Што цяпер адбываецца ў Нацыянальным аэрапорце «Менск»
Cancelled — першае, што кідаецца ў вочы на вялікім сінім табло вылетаў у вялікай залі аэрапорта. Такія надпісы чырвонымі літарамі, напераменку па-ангельску, па-беларуску і па-кітайску, высьвечваюцца насупраць нумароў рэйсаў у Варшаву і Амстэрдам. Калі адлёты зьмяняюцца назвамі блізкіх прылётаў — тыя ж чырвоныя літары высьвечваюцца насупраць Мілана і, нечакана, Калінінграда. Расейскі анкляў пацярпеў праз закрыцьцё для беларускіх самалётаў паветранай прасторы Польшчы і Літвы. Даляцець туды зь Менску безь перасадак можна цяпер толькі кругам праз Латвію і Балтыйскае мора.
Чытайце наш рэпартаж з Нацыянальнага аэрапорту Менск>>>
Чэргі ў касах «Белавіі» на вяртаньне квіткоў
У Менску ў касах нацыянальнай авіякампаніі «Белавія» ўтварыліся чэргі на вяртаньне квіткоў з-за скасаваньня рэйсаў у краіны Эўразьвязу.
Людзі кажуць, што сваёй чаргі ім прыходзіцца чакаць ад 2,5 гадзін і болей. Раней шэраг краін Эўропы забараніў авіятранспарту «Белавіі» карыстацца сваімі паветранымі прасторамі. Пра скасаваньне палётаў па-над Беларусьсю заявіў шэраг аўтарытэтных авіякампаній.
Расея перашкаджае Эўропе блякаваць паветраную прастору Беларусі
Расея не дала дазволу Austrian Airlines на прыбыцьцё рэйсу зь Вены ў Маскву не праз тэрыторыю Беларусі, паведамілі ў аўстрыйскай авіякампаніі. Пра гэта інфармуе ТАСС.
Напярэдадні француская авіякампанія AirFrance вымушаная была адмяніць рэйс AF1154 з Парыжу ў Маскву. У авіякампаніі патлумачылі, што рэйс прыйшлося адмяніць з тэхнічных прычынаў, зьвязаных з абыходам беларускай паветранай прасторы. Праз гэта экіпажу спатрэбіўся новы дазвол ад Расеі, але ён яго не атрымаў.
Расейскі «Аэрофлот» адмяніў адзіны на тыдзень рэйс у Вільню
На онлайн-таблё авіякампаніі пазначана, што рэйс, які выконваецца раз на тыдзень у пятніцы, скасаваны. «Аэрофлот» не тлумачыў прычыну адмены.
26 траўня літоўскі ўрад забараніў ляцець у Літву ці зь Літвы праз тэрыторыю Беларусі. Такім чынам, трапіць у Літву, абмінуўшы Беларусь, можна праз тэрыторыю Латвіі.
Сёньняшні рэйс расейскай авіякампаніі «Руслайн» з маскоўскага аэрапорта «Внуково» у Вільню рыхтуецца паводле раскладу.
Улады Эстоніі паведамілі пра закрыцьцё аэрапортаў для самалётаў авіякампаніі «Белавія»
«Як і іншыя эўрапейскія дзяржавы, Эстонія забароніць палёты „Белавія“ ў свае аэрапорты. Афіцыйнае рашэньне будзе аформлена сёньня пасьля абеду», — заявіла прэмʼер-міністар Эстоніі Кая Калас, перадае «Интерфакс-Запад».
«Як што мы не аўтакратычная дзяржава, то калі прымаем рашэньне, яго трэба аформіць у адпаведнасьці з вымогамі прававой дзяржавы. Але ў кожным разе сёньня пасьля абеду мы гэта зробім», — дадала прэмʼер.
У першай палове дня 27 траўня «Белавія» выканала рэйс зь Менску ў Талін і назад транзытам цераз Латвію.
Латвія, якая 25 траўня заявіла пра закрыцьцё неба для беларускіх авіякампаній, удакладніла па факце пралёту, што рашэньне ня тычыцца транзытных рэйсаў.
Літва закрыла сваю паветраную прастору нават для транзытных рэйсаў зь Беларусі, у выніку чаго «Белавія» мусіла скасаваць пералёты ў Калінінград.
«У вас бомба». Беларуская афіцыйная вэрсія перамоваў зь пілётамі самалёта Ryanair выклікае больш пытаньняў, чым адказаў
Чытайце па спасылцы вялікі аналітычны матэрыял «Радыё Свабода».
«Белавія» адмяніла рэйсы ў 8 эўрапейскіх краін і расейскі Калінінград
У эўрапейскіх напрамках скасаваньне рэйсаў прадугледжана як мінімум да 30 кастрычніка:
- Варшава
- Мілян
- Амстэрдам
- Рым
- Франкфурт
- Бэрлін
- Мюнхен
- Гановэр
- Вена
- Брусэль
- Барсэлёна
- + Калінінград.
Як гаворыцца ў паведамленьні на сайце беларускага нацыянальнага авіяперавозчыка, цяпер дзейнічаюць абмежаваньні на палёты ў восем краін. Тычыцца гэта ў тым ліку Калінінграду — расейскі анкляў недаступны праз забарону палётаў для беларускіх кампаній, уведзеных Літвой.
«Мы шкадуем, што нашым пасажырам давялося сутыкнуцца з сытуацыяй, якая склалася зь не залежных ад авіякампаніі прычынаў, і абяцаем прыкласьці ўсе намаганьні дзеля яе вырашэньня», — адзначаюць у «Белавія» .
Латвія пакуінула магчымасьць беларускім авіякампаніям ляцець транзытам
Самалёт «Белавія» з Таліна падлятае да Менску. Эстонія не спыняла авіязносінаў зь Беларусьсю, хоць асудзіла інцыдэнт з бортам Ryanair. Але рэкамэндавала сваім авіякампаніям ня лётаць цераз паветраную прастору Беларусі.
Латвія 25 траўня паведаміла, што спыніла авіязносіны зь Беларусьсю і закрыла для яе сваю паветраную прастору.
Але 27 траўня, калі стала бачна, што самалёт «Белавія» ляціць з Таліна ў Менск над Латвіяй, кіраўнік Агенцтва грамадзяснкай авіяцыі Латвіі ўдакладніў, што забарона ня тычыцца транзыту беларускіх авіякампаній, паведаміла ТАСС.
СМІ: Ліст пра бомбу прыйшоў на пошту менскага аэрапорту толькі праз 24 хвіліны пасьля папярэджаньня дыспэтчара
Амэрыканскае выданьне Daily Beast паведаміла, што ліст пра «бомбу ХАМАСа» прыйшоў на пошту менскага аэрапорту толькі праз 27 хвілін пасьля таго, як самалёт увайшоў у паветраную прастору Беларусі і праз 24 хвіліны пасьля таго, як менскі дыспэтчар заявіў пілётам пра пагрозу выбуху пілётам.
Daily Beast сьцьвярджае, што з дапамогай цэнтру «Дасье» расейскага палітыка Міхаіла Хадаркоўскага атрымала арыгінал гэтага ліста. І што яно было толькі праз 24 хвіліны пасьля таго, як дыспэтчар менскага аэрапорту папярэдзіў пілётаў пра пагрозу.
Паводле Daily Beast, «ХАМАС» патрабаваў ад Эўразьвязу адмовіцца ад падтрымкі Ізраілю, а таксама каб Ізраіль спыніў агонь у Сэктары Газа. Інакш пагражалі ўзарваць бомбу над Вільняй.
Выданьне зазначае, што на момант адпраўкі ліста ўжо два дні як было падпісанае пагадненьне паміж Ізраілем і ХАМАС пра спыненьне агню.
ХАМАС адмаўляе сваю датычнасьць да інцыдэнту.
Рада Бясьпекі ААН, у якую ўваходзіць і Расея, 26 траўня заклікала Міжнародную арганізацыю грамадзянскай авіяцыі расьсьледаваць перахоп рэйсу Ryanair. Да гэтага патрабаваньня далучылася Нямеччына і Бэльгія, якія не ўваходзяць у Раду Бясьпекі ААН.
Славаччына забараніла палёты беларускіх авіякампаній
«Гэта ясны адказ на недапушчальныя дзеяньні і парушэньне правілаў беларускіх рэжымам», — напісаў міністар замежных спраў краіны Іван Корчак.
МЗС пракамэнтаваў разварот рэйсу «Белавія» ў Барсэлёну
Прэс-сакратар МЗС Анатоль Глаз назваў разварот рэйсу авіякампаніі «Белавія» Менск — Барсэлёна 26 траўня «цалкам абуральным фактам і амаральным учынкам».
«Шчыра кажучы, ужо практычна паветранае пірацтва», — цытуе Глаза БелТА.
Польшча забараніла беларускім самалётам карыстацца сваёй паветранай прасторай
Кабінэт міністраў Польшчы прыняў рашэньне аб забароне на ўваход у паветраную прастору краіны паветраных суднаў, якія выкарыстоўваюцца перавозчыкамі зь Беларусі.
Пра гэта заявіў прэс-сакратар ураду Пётар Мюлер, паведаміў тэлеканал TVN24.
«Гэта элемэнт рэалізацыі санкцый, якія прапанаваў падчас пасяджэньня Эўрапейскай рады прэм’ер-міністар Матэвуш Маравецкі», — адзначыў Мюлер.
Тым часам самалёт з Кіева ў Талін робіць крук, каб абляцець Беларусь.
У Варшаву ляціць яшчэ адзін самалёт зь Менску
Абноўлена. Гэты борт-ткі пусьцілі ў паветраную прастору Польчшы, ён ляціць у Варшаву.
Борт «Белавія» зь Менску ў Варшаву знаходзіцца ў дадзены момант у раёне Слоніму і скіроўваецца ў бок польскай мяжы. Сачыць за яго перамяшчэньнем можна тут.
Польшча не пусьціла самалёт «Белавія», які ляціць у Барсэлёну
Рэйс «Белавія» зь Менску ў Барсэлёну, не даляцеўшы да польскай мяжы, пачаў рабіць кругі Берасьцейскай вобласьцю. Польскі рэгулятар не дапусьціў гэты борт у польскае неба, паведамілі «РИА Новости».
Італьянская авіякампанія Alitalia будзе аблятаць Беларусь у сваіх грузавых рэйсах у сувязі з інцыдэнтам з самалётам Ryanair.
Фінляндыя забараніла палёты «Белавія».