У заяве, зьмешчанай на сайце Рады БНР, гаворыцца, што «Вітольд Ашурак, незаконна асуджаны на пяць гадоў зьняволеньня, памёр пры невытлумачальных абставінах пасьля таго, як паведаміў у лісьце пра прыніжальную практыку лукашэнкаўскіх турмаў пазначаць палітычных вязьняў жоўтымі імяннымі біркамі. Акрамя агіднай паралелі з практыкай нацыстаў, якія пазначалі жоўтым колерам габрэяў падчас Галакосту, палітычныя вязьні ў беларускіх турмах цярпяць дадатковую дыскрымінацыю ў параўнаньні з асуджанымі па крымінальных артыкулах. Для палітычных вязьняў ствараюцца невыносныя і прыніжальныя побытавыя ўмовы, яны цярпяць зьдзекі і зьбіцьцё з боку турэмшчыкаў».
Рада БНР зьвяртае ўвагу, што «дзеяньні рэжыму Лукашэнкі па захопу Рамана Пратасевіча ня толькі супярэчаць шматлікім міжнародным нормам і пагадненьням, удзельнікам якіх ёсьць Рэспубліка Беларусь, але таксама могуць быць клясыфікаваныя як акт міжнароднага тэрарызму, у якім Рэспубліка Беларусь на чале з былым прэзыдэнтам Аляксандрам Лукашэнкам выступае як дзяржава-тэрарыст».
У сваёй заяве Рада БНР заклікала міжнародную супольнасьць «аказаць увесь магчымы ціск, уключна з эканамічнымі санкцыямі і выключэньнем зь Міжнароднай арганізацыі грамадзянскай авіяцыі (ICAO), на рэжым Лукашэнкі, а таксама на ягонага палітычнага і эканамічнага спонсара Расейскую Фэдэрацыю, з мэтаю вызваленьня ўсіх беларускіх палітычных вязьняў».
