Лінкі ўнівэрсальнага доступу

«Гэта беспрэцэдэнтны акт дзяржаўнага тэрарызму». Міжнародныя рэакцыі на прымусовую пасадку ў Менску самалёта Ryanair


Пасаджаны ў Менску самалёт Ryanair. Фота: delfi.lt
Пасаджаны ў Менску самалёт Ryanair. Фота: delfi.lt

Працягваюць паступаць міжнародныя рэакцыі на прымусовую пасадку ў Менску самалёта авіякампаніі Ryanair. Апазыцыйны актывіст Раман Пратасевіч, які ляцеў гэтым рэйсам, быў арыштаваны ў Менску.

Прэм’ер-міністар Польшчы Матэвуш Маравецкі:

«Я зьвярнуўся да старшыні Эўрапейскай рады наконт дапаўненьня парадку дня заўтрашняй Эўрапейскай рады пунктам аб неадкладным увядзеньні санкцыяў супраць рэжыму Лукашэнкі. Захоп цывільнага самалёта — гэта беспрэцэдэнтны акт дзяржаўнага тэрарызму, які ня можа застацца беспакараны».

Старшыня Эўракамісіі Урсуля фон дэр Ляен:

«Абсалютна непрымальна прымушаць да пасадкі ў Менску рэйсу Ryanair з Атэнаў у Вільню. УСЕ пасажыры мусяць неадкладна атрымаць магчымасьць працягваць палёт у Вільню, іх бясьпека мусіць быць гарантаваная.

Любое парушэньне міжнародных правілаў авіяперавозак мусіць цягнуць за сабой наступствы».

Кіраўнік дыпляматычнай службы ЭЗ Жузэп Бурэль:

«Мы ўважліва сочым за падзеямі вакол сёньняшняга рэйсу Ryanair з Атэнаў у Вільню, які быў прымусова пасаджаны ў Менску з прычыны меркаванай пагрозы бясьпецы. Гэта абсалютна недапушчальна. Мы лічым улады Беларусі адказнымі за бясьпеку ўсіх пасажыраў і самалёта. УСЕ пасажыры мусяць атрымаць магчымасьць неадкладна працягваць падарожжа».

Старшыня Эўрапейскай рады Шарль Мішэль:

«Мы вельмі занепакоеныя паведамленьнямі аб прымусовай пасадцы ў Менску самалёта Ryanair. Заклікаем беларускія ўлады неадкладна вызваліць самалёт і яго пасажыраў. Неабходна, каб Міжнародная арганізацыя грамадзянскай авіяцыі (ICAO) правяла расьсьледаваньне інцыдэнту».

Сустаршыня Эўрапейскай рады міжнародных дачыненьняў, былы міністар замежных справаў Швэцыі Карл Більт:

«Настаў час Эўразьвязу ўжыць у дачыненьні да Беларусі “мову сілы”. Дзяржаўнае пірацтва ў паветры паміж сталіцамі краінаў Эўразьвязу абсалютна недапушчальнае».

Міністар замежных справаў Францыі Жан-Іў Лё Дрыян:

«Зьмена беларускімі ўладамі курсу рэйсу Ryanair недапушчальная. Неабходны цьвёрды і супольны адказ эўрапейцаў. Усім пасажырам рэйсу, у тым ліку магчымым беларускім апазыцыянэрам, мусіць быць дазволена неадкладна пакінуць Беларусь».

Прэзыдэнт Літвы Гітанас Наўседа выступіў з заявай з нагоды сёньняшняга здарэньня:

«Сёньня пасажырскі самалёт, які ляцеў у Вільню, быў прымусова пасаджаны ў Менску падуладнай беларускаму рэжыму службай. Паводле першапачатковых зьвестак, сілы беларускага рэжыму затрымалі прадстаўнік беларускай апазыцыі Рамана Пратасевіча, якому ў Літве нададзены прытулак і які ляцеў у Вільню.

Я патрабую, каб беларускі рэжым неадкладна вызваліў затрыманага і дазволіў яму, як і ўсім астатнім пасажырам самалёта, працягваць рэйс у Вільню. Я заклікаю саюзьнікаў у NATO і ЭЗ неадкладна адрэагаваць на пагрозу, якую беларускі рэжым стварае міжнароднай грамадзянскай авіяцыі. Міжнародная супольнасьць павінна прыняць неадкладныя захады, каб прадухіліць паўтарэньне падобных інцыдэнтаў. Я буду гаварыць пра гэта на Эўрапейскай радзе, якая пачнецца заўтра ў Брусэлі», — напісаў прэзыдэнт Літвы.

Раней ён напісаў у Твітэры:

«Беспрэцэдэнтнае здарэньне! Цывільны пасажырскі самалёт, які ляцеў у Вільню, быў прымусова пасаджаны ў Менску. Беларускі палітычны актывіст і заснавальнік @NEXTA_EN быў на борце. Ён арыштаваны. За гэтай агіднай акцыяй стаіць беларускі рэжым. Патрабую неадкладнага вызваленьня Рамана Пратасевіча!»

Міністар замежных справаў Літвы Габрыелюс Ландсбергіс напісаў у Фэйсбуку:

«Трывожныя навіны пра прымусовую пасадку ў Менску міжнароднага рэйсу з Атэнаў у Вільню. Мы працуем зь міжнароднымі партнэрамі, каб гарантаваць бясьпечнае вяртаньне ўсіх падарожнікаў у Вільню».

З нагоды інцыдэнту выказаўся і былы міністар замежных справаў Літвы, амбасадар для асаблівых даручэньняў Лінас Лінкявічус:

«Уся гэтая неабдуманая і незаконная „апэрацыя“ спэцслужбаў беларускага рэжыму заслугоўвае моцнага адказу, а ня толькі асуджэньня. Немагчыма карыстацца паветранай прасторай, якую кантралююць рэжымныя злачынцы».

МЗС Украіны:

«Чарговы раз трывожныя навіны зь Беларусі. Гэтым разам у Менску затрыманы беларускі журналіст Раман Пратасевіч. Чарговая атака на свабоду слова з боку беларускай улады. патрабуем неадкладнага вызваленьня»и

Лідэр Эўрапейскай народнай партыі Дональд Туск:

«Лукашэнка стаў пагрозай ня толькі для грамадзянаў сваёй краіны, але таксама для міжнароднай бясьпекі. Ягоны акт дзяржаўнага тэрарызму патрабуе неадкладнай і рашучай рэакцыі ўсіх эўрапейскіх урадаў і інстытуцыяў».

Журналіст Bellingcat Хрыста Грозеў даў свой камэнтар пра здарэньне

«Гэта сур’ёзнае парушэньне Чыкагскай канвэнцыі аб міжнароднай грамадзянскай авіяцыі і можа кваліфікавацца як тэрарыстычны акт, які ставіць пад пагрозу сотні жыцьцяў на борце і на зямлі.

Калі да гэтага часу Беларусь не была паўнавартаснай дзяржавай-ізгоем, то цяпер яна, безумоўна, стала ім. Іран і Паўночная Карэя не адважыліся б на такі крок».

МЗС Аўстрыі:

«Трывожныя паведамленьні пра самалёт Ryanair, які быў перанакіраваны ў Менск. Усім пасажырам мусіць быць дазволена працягваць іх палёт, нам патрэбнае незалежнае міжнароднае расьсьледаваньне гэтага інцыдэнту. Мы патрабуем неадкладнага вызваленьня актывіста Рамана Пратасевіча».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG