Гэта вынікае з указу прэзыдэнта Ўкраіны Ўладзіміра Зяленскага аб увядзеньні ў дзеяньне рашэньня Рады нацыянальнай бясьпекі і абароны (РНБА) аб прымяненьні пэрсанальных спэцыяльных эканамічных ды абмежавальных захадаў. Указ быў падпісаны 14 траўня.
Санкцыі супраць двух беларускіх прадпрыемстваў былі ўведзеныя ў траўні 2018 году на тры гады, цяпер тэрмін іх дзеяньня скончыўся. Гэта азначае, што ўжо ў чэрвені беларускія прадпрыемствы пры жаданьні могуць аднавіць свае дачыненьні з украінскімі партнэрамі.
Згодна з указам прэзыдэнта Ўкраіны, на тры гады падоўжылі санкцыі супраць расейскіх друкаваных і онлайнавых мэдыярэсурсаў і тэлеканалаў, а таксама супраць кампаній, якія займаліся праграмным забесьпячэньнем. Паводле ўказу прэзыдэнта Ўкраіны Ўладзіміра Зяленскага заблякаваныя ўсе іхныя актывы, цалкам прыпыненыя гандлёвыя апэрацыі, ануляваныя ліцэнзіі і забаронены ўдзел у тэндэрах на закуп тавараў і паслуг. Усё гэта на тры гады.
Адначасова пад санкцыі — бестэрміновае блякаваньне актываў і забарона любой дзейнасьці ва Ўкраіне — падпалі тры вядомыя беларускія злодзеі ў законе:
- Павал Алексіевіч (ALEKSEEVICH PAVEL, нарадзіўся 14 лістапада 1981 году ў Беларусі, грамадзянін Беларусі, у крымінальных колах вядомы як Паштэт)
- Алег Герасімовіч (GERASIMOVICH OLEG, нарадзіўся 1 сакавіка 1974 году ў Беларусі, грамадзянін Беларусі, вядомы ў крымінальных колах як Алег Слуцкі і Муму).
- Аляксандар Кушняроў (KUSHNEROV ALEXANDER, нарадзіўся 29 ліпеня 1966 году ў Беларусі, грамадзянін Беларусі, у крымінальных колах вядомы як Саша Кушнер і Саша Беларус).
Усяго ў санкцыйны сьпіс уключаныя 138 юрыдычных і 674 фізычныя асобы, зьвязаныя з агрэсіяй Расеі і крымінальнымі коламі.
Сёлета ў сакавіку пад санкцыі падпалі менскія таварыствы з абмежаванай адказнасьцю «Лайф Груп» (працуе з 2009 году як дыстрыбутар беларускіх касмэтычных брэндаў) і «Экмі Касмэтыкс Груп» (створана ў 2017 годзе, займаецца вытворчасьцю парфумэрных і касмэтычных сродкаў). Абодва маюць вялікае прадстаўніцтва для прасоўваньня беларускай прадукцыі на ўкраінскім рынку.
